کراچی(اسپورٹس رپورٹر)کشمیر پریمیئر لیگ کے دوسرے ایڈیشن کے شیڈول کا اعلان کر دیا گیا۔ترجمان کے پی ایل کے مطابق کشمیر پریمیئر لیگ میں 25 ٹی ٹونٹی ڈے اینڈ نائٹ میچز 11 سے 25 اگست تک کھیلے جائیں گے۔ مظفر آباد کرکٹ سٹیڈیم کشمیر پریمیئر لیگ کے دوسرے ایڈیشن کی میزبانی کرے گا۔سپائے کیم، ہاک آئی اور بگی کیم کی مدد سے کے پی ایل کی کوریج کی جائے گی۔قومی ٹیم کے سابق کپتان جاوید میانداد نے کہا ہے کہ کشمیر ہمارا دل ہے، کشمیر میں کرکٹ سے نیا ٹیلنٹ سامنے آئے گا۔ کشمیر میں ہر بچہ کرکٹ کو بہت پسند کرتا اور کھیلنا چاہتا ہے، کشمیری بچے ہمارے اور آپ کے تصور سے زیادہ کرکٹ کے شوقین ہیں۔ کشمیر پریمیئر لیگ سے آزاد کشمیر میں بڑا فرق پڑے گا، کے پی ایل کیساتھ دیگر لیگز بھی ہونی چاہئیں۔ ڈومیسٹک کرکٹ میں اتنا پیسہ نہیں ملتا جتنا کہ کرکٹر لیگ کھیلنے سے کمایا جاتا ہے۔