لاہور (نامہ نگار) ڈکیتی و چوری کی وارداتوں کے دوران متعدد شہریوں سے لاکھوں روپے، زیورات، موبائل فون،موٹر سائیکلیں،گاڑیاں اور دیگر سامان لوٹ لیا گیا۔ ڈاکوؤں نے جوہر ٹاؤن میں صلاح الدین کے گھر اہلخانہ کو گن پوائنٹ پر یرغمال بنا کر 6 لاکھ روپے‘ زیورات، موبائل فون اور دیگر سامان، ڈیفنس میں عامر کی فیملی کو یرغمال بنا کر4لاکھ 55 ہزار روپے، زیورات اور موبائل فون، شیرا کوٹ میں وقاص سے3 لاکھ 35ہزار روپے اور موبائل فون، ملت پارک میں دانش سے ایک لاکھ روپے اور موبائل فون، شادباغ میں علی رضا سے 80 ہزارروپے اور موبائل فون، فیکٹری ایریا میں مجاہد سے 16ہزار روپے اور موبائل فون، مناواں میں زاہد سے10 ہزار روپے اور موبائل فون، لٹن روڈ میں ساجد سے 9 ہزار روپے اور موبائل فون، کاہنہ میں فرخ سے9 ہزار روپے اور موبائل فون لوٹ لیا اور فرار ہوگئے۔ چوروں نے قائداعظم انڈسٹریل اسٹیٹ میں یاسین کے گھر سے ساڑھے 5 لاکھ روپے، زیوارت اور دیگر سامان چوری کر لیا اورفرار ہو گئے۔ مسلم ٹاؤن، ہنجروال، لیاقت آباد اور رائیونڈ سے 4 کاریں، مزنگ سے رکشہ جبکہ نواب ٹاؤن، لوئر مال، ساندہ، ٹاؤن شپ، قلعہ گجر سنگھ، غالب مارکیٹ، شاہدرہ اور نشتر کالونی سے 8 موٹر سائیکلیں چوری کر لی گئیں۔