ساؤ پالو: برازیل کے سابق صدر بولسونارو پر فردِ جرم عائد کر دی گئی۔
غیر ملکی میڈیا رپورٹس کے مطابق برازیل کی وفاقی پولیس نے سابق صدر جائر بولسونارو پر منی لانڈرنگ اور سعودی عرب سے ملنے والے ہیروں کے کیس سے مجرمانہ طور پر جڑے ہونے کے الزامات پر فرد جرم عائد کر دی ہے۔
بولسونارو پر الزام ہے کہ انھوں نے سعودی عرب سے ملنے والا 3 ملین ڈالر مالیت کا جیولری سیٹ خلاف قانون اپنے پاس رکھا، دو بیش قیمت گھڑیاں بیچ کر 70 ہزار ڈالر حاصل کیے۔
امریکی اخبار واشنگٹن پوسٹ کے مطابق برازیل کی سپریم کورٹ کو پولیس سے فردِ جرم کی رپورٹ ملنے پر پراسیکیوٹر جنرل فیصلہ کریں گے کہ آیا بولسونارو پر مقدمہ چلے گا یا نہیں۔ ایسوسی ایٹڈ پریس کے مطابق برازیل کی سپریم کورٹ کو ابھی تک فرد جرم کے ساتھ پولیس رپورٹ موصول نہیں ہوئی ہے۔
برازیل کے پراسیکیوٹر جنرل پاؤلو گونیٹ اس کے بعد دستاویز کا تجزیہ کریں گے اور فیصلہ کریں گے کہ آیا الزامات دائر کیے جائیں اور بولسونارو کو مقدمے کی سماعت پر مجبور کیا جائے۔
اس فرد جرم نے ڈرامائی طور پر سابق رہنما کو درپیش قانونی خطرات کو بڑھا دیا ہے، ان کے مخالفین نے فرد جرم کو سراہا ہے جب کہ ان کے حامیوں نے اسے سیاسی مقدمہ کہہ کر اس کی مذمت کی ہے۔