کراچی (نیوز ڈیسک+کرائم رپورٹر) شہر قائد کے علاقے گلستان جوہر بلاک 12 میں پولیس کے ساتھ فائرنگ کے تبادلے میں ایک ڈاکو ہلاک دوسرا گرفتار ہو گیا جس سے تفتیش کے بعد ہی مرنے والے اس کے ساتھی کی شناخت ظاہر کی جائے گی۔ پولیس نے ڈاکوؤں سے اسلحہ اور چھینی گئی موٹرسائیکل برآمد کر لی۔ دریں اثناء پی آئی بی کالونی میں پولیس موبائل پر موٹرسائیکل سواروں کی فائرنگ سے ایک اہلکار شدید زخمی ہو گیا جبکہ حملہ آور فرار ہو گئے۔ اطلاع ملتے ہی رینجرز اور پولیس کی بھاری نفری نے علاقے کو گھیرے میں لے لیا اور سرچ آپریشن شروع کر دیا۔ پی آئی بی کالونی میں ہی پرانی سبزی منڈی گراؤنڈ سے 28 سالہ نوجوان کی تشدد زدہ نعش ملی جس کی فوری شناخت نہ ہو سکی جبکہ گوٹھ نبی بخش کے علاقے میں شو مارکیٹ بلڈنگ کی چھت سے 19 سالہ دانیال کی گولیاں لگی نعش ملی۔ شبہ ہے کہ اسے اس کے دوست نے قتل کیا جسے حراست میں لے لیا گیا۔