کوٹ ادو(خبر نگار‘ کورٹ رپورٹر) سابق گورنر پنجاب ومرکزی رہنما تحریک انصاف ملک غلام مصطفی کھرنے کہا ہے کہ شریف برادران نے ہمیشہ گری ہوئی حرکتیں کی ہیں،انہوں نے کہا ہے کہ ریحام خان سے عمران خان کے اوپر کتاب لکھوانا ان کی اخلاقی اور سیاسی شکست ہے، شریف برادران نے میرے اوپر بھی میری سابقہ اہلیہ تہمینہ درانی سے بھی کتاب لکھوائی تھی جس میں میری کردار کشی کرائی گئی تھی اسی طرح ریحام خان نے بھی عمران خان پر بہت گھٹیا الزام لگائے ہیں لیکن میں کہتا ہوں کہ ان گھٹیا الزامات سے عمران خان کی شہرت اور عزت میں کوئی فرق نہیں پڑے گا انہوں نے کہا کہ عمران خان ایماندار اور دلیرانسان ہے میں پاکستان کی قوم کو یقین سے کہتا ہوں کہ عمران خان پاکستان کی قوم کیلئے مہاتیر محمد اور طیب اردگان ثابت ہوں گے کیونکہ میں نے اب عمران خان کو قریب سے دیکھا اور سمجھا ہے اس میں پاکستان کو اوپر لے جانے کا جذبہ ہے انہوں نے کہا کہ عمران خان لالچی اور کرپٹ نہیں ہے اس کا دامن صاف ہے ان پر الزام لگانے والے بوکھلاہٹ کا شکار ہیں، انہوں نے کہا کہ کیا میں اس عمر میں کرپشن کروں گا یا عیاشی کروں ہرگز نہیں میں صرف خدمت کرکے آپنی قبر روشن کرنا چاہتاہوں کیونکہ اس عمر میں بندہ اﷲ کے بہت قریب ہوتا ہے، انہوں نے کہا کہ جمعرات کو این اے 181سے پاکستان تحریک انصاف کے پلیٹ فارم سے آئیندہ الیکشن کیلئے الیکشن کوٹ ادو میں کاغذات جمع کراؤں گا۔