قومی کرکٹرز ملتان پہنچ گئے ، مہمان سکواڈ کی آج آمد ، سٹیڈیم تیار 

لاہور(سپورٹس رپورٹر) پاکستان اور ویسٹ انڈیز کے درمیان ون ڈے انٹر نیشنل سیریز 8جون سے شرع ہوگی ۔ پی سی بی کی جانب سے جاری اعلامیہ کے مطابق پاکستان اور ویسٹ انڈیز کے مابین 8 جون بروز بدھ سے شروع ہونے والی ون ڈے انٹرنیشنل سیریز اولیائے کے شہرملتان میں 14 سال بعد بین الاقوامی کرکٹ کی واپسی کا سبب بنے گی، تین میچز کی یہ سیریز آئی سی سی مینز کرکٹ ورلڈکپ سپر لیگ کا حصہ ہے۔سیریز میں دونوں ٹیموں سے سنسنی خیز کرکٹ مقابلوں کی توقع ہے تاہم یہ گراؤنڈ اس سے قبل بھی کئی یادگار کرکٹ میچز کی میزبانی کرچکا ہے،ملتان کرکٹ سٹیڈیم میں پہلا بین الاقوامی کرکٹ میچ 2001 میں کھیلا گیا تھا اس ٹیسٹ میچ میں پاکستان نے مہمان بنگلہ دیش کو ایک اننگز اور 264 رنز سے شکست دی تھی۔ون ڈے انٹرنیشنل میچز میں شرکت کیلئے قومی کرکٹ ٹیم پہنچ گئی جبکہ مہمان سائیڈ سکواڈ بذریعہ اسلام آباد خصوصی پروز کے ذریعے آج ملتان پہنچے گا۔ یہ دوسرا موقع ہوگا کہ جب ویسٹ انڈین سکواڈ کوئی ون ڈے انٹرنیشنل میچ کھیلنے ملتان پہنچے گا۔اس سے قبل دونوں ٹیمیں 13 دسمبر 2006 کو مدمقابل آئیں۔ ملتان کا خوبصورت کرکٹ سٹیڈیم اس سے قبل 7 ون ڈے انٹرنیشنل میچز کی میزبانی کرچکاہے، جس میں سے 4 میں پاکستان نے کامیابی حاصل کی۔ یہاں پہلا ون ڈے انٹرنیشنل ستمبر 2003 میں پاکستان اور بنگلہ دیش کے مابین کھیلا گیا، جہاں میزبان سائیڈ نے بنگلہ دیش کو 137 رنز سے شکست دی۔ملتان کرکٹ سٹیڈیم میں کھیلا گیا آخری ون ڈے انٹرنیشنل بھی انہی دونوں ٹیموں کے مابین کھیلا گیا تھا، جس میں پاکستان نے فتح حاصل کی۔۔ ملتان کرکٹ سٹیڈیم میں 35 ہزار تماشائیوں کے بیٹھنے کی گنجائش ہے۔ یہ سٹیڈیم وہاڑی روڈ پرواقع ہے۔فروری 2020 میں اس وینیو نے پی ایس ایل کے تین میچز کی میزبانی کی تھی۔ اس وینیو پر سب سے زیادہ ون ڈے انٹرنیشنل رنز پاکستان کے سابق اوپنر یاسر حمید نے سکور کررکھے ہیں۔ انہوں نے یہاں 4 اننگز میں 197 رنز بنائے۔ انضمام الحق کا نمبردوسرا ہے جن کے رنز کی تعداد 178 ہے۔مارلن سیموئلز سمیت چار بیٹرز ملتان کرکٹ سٹیڈیم میں سنچریاںسکور کرچکے ہیں۔ پاکستان کے یاسر حمید، عبدالرزاق اور بنگلہ دیش کے شکیب الحسن شامل ہیں۔شعیب ملک اور شاہد آفریدی اس گراؤنڈ پر چھ چھ وکٹیں حاصل کرچکے ہیں جبکہ بھارت کے فاسٹ باؤلر آر پی سنگھ چار کھلاڑیوں کو پویلین کی راہ دکھاچکے ہیں۔ اگست 2001 سے نومبر 2006 کے دوران ایم سی ایس نے پانچ ٹیسٹ میچز کی میزبانی کی۔ نتیجہ خیز رہنے والے چار میں سے تین میں پاکستان نے کامیابی حاصل کی۔ پاکستان نے ملتان کرکٹ سٹیڈیم میں انگلینڈ کو ایک اور بنگلہ دیش کو دو مرتبہ ٹیسٹ میں شکست دی جبکہ بھارت نے اس وینیو پر کھیلے گئے اپنے واحد ٹیسٹ میں کامیابی حاصل کی۔ پاکستان اور ویسٹ انڈیز کے مابین کھیلا گیا ٹیسٹ ڈرا ہوا۔پاکستان کے موجودہ بیٹنگ کوچ اور سابقہ بیٹر محمد یوسف 517 ٹیسٹ رنزبناکر ایم سی ایس کے بیٹنگ چارٹ میں سرفہرست ہے۔ وہ اس وینیو پر تین سنچریاں بنانے والے واحد بیٹربھی ہیں۔ بھارت کے وریندر سہواگ اور ویسٹ انڈیزکے برائن لارا نے ملتان کرکٹ سٹیڈیم میں بالترتیب ٹرپل اور ڈبل سنچری سکور کررکھی ہے۔پاکستان کے دنیش کنیریا اس گراؤنڈ میں کھیلی گئی 5 ٹیسٹ اننگز میں 22 وکٹیں حاصل کرچکے ہیں