لاہور ( سپورٹس رپورٹر) کرکٹ کے علاوہ دیگر کھیلوں سے تعلق رکھنے والے نامور پاکستانی کھلاڑیوں نے بھی آئی سی سی ٹی ٹونٹی ورلڈ کپ 2024میں حصہ لینے والی پاکستان ٹیم کی کامیابی کیلئے نیک خواہشات کا اظہار کرتے ہوئے امید ظاہر کی ہے کہ یہ ٹیم قوم کی توقعات پر پورا اترے گی۔دس برٹش اوپن اور چھ ورلڈ اوپن ٹائٹلز جیتنے والے جہانگیرخان نے کہا کہ پوری قوم کی نیک خواہشات اس ٹیم کیساتھ ہیں اور ہمیں امید ہے کہ یہ ٹیم ہمیں اچھی خبر سنائے گی۔ اس ٹیم میں سینئر اور جونیئر کھلاڑی شامل ہیں اور اگر یہ ایک دوسرے کو سپورٹ کرتے ہوئے آگے بڑھیں گے تو مجھے یقین ہے کہ یہ ٹیم بہترین پرفارمنس دیگی۔ پاکستان ہاکی ٹیم کے سابق کپتان اصلاح الدین نے کہا کہ پاکستان ٹیم میں بے پناہ ٹیلنٹ موجود ہے ۔ پاکستان  پہلے بھی یہ ٹی ٹونٹی ورلڈ کپ جیت چکا ہے اور اب قوم پھر منتظر ہے کہ ٹیم دوبارہ عالمی چیمپئن بن کو واپس لوٹے گی ،پوری قوم ٹیم کی کامیابی کیلئے دعاگو ہے۔سابق اولمپئن سمیع اللہ کہتے ہیں کہ ہمیں اس ٹیم سے بڑی امیدیں وابستہ ہیں اور یہ ہماری امیدوں پر پورا اترے گی۔ پاکستان کرکٹ بورڈ نے اس ٹیم کی بہت اچھی تیاری کرائی ہے اور کھلاڑیوں نے بھی سخت محنت کی ہے،کھلاڑیوں کو چاہیے کہ وہ ہر میچ کو دل لگاکر کھیلیں۔ٹینس گرینڈ سلیم فائنل کھیلنے والے واحد پاکستانی کھلاڑی اعصام الحق کو بھی امید ہے کہ  بابراعظم کی قیادت میں پاکستان ٹیم ٹرافی جیت کر وطن آئیگی اور ہمیں فخر کرنے کاموقع فراہم کرے گی۔ جیولن تھرو کے کامن ویلتھ گیمز گولڈ میڈلسٹ ارشد ندیم نے کہاکہ جس طرح ٹیم نے سخت محنت کی ہے اور اس عالمی ایونٹ کیلئے تیاری کی ہے اس کا پھل ضرور ملے گا ۔امید ہے کہ ٹیم ٹی ٹونٹی ورلڈ کپ میں اپنی بہترین پرفارمنس دے گی تو اسی میں اس کی جیت ہوگی۔کے ٹو کی چوٹی سر کرنے والے دنیا کے سب  سے کم عمر کوہ پیما شہروز کاشف نے کہاکہ ہماری توقعات اس ٹیم کیساتھ جڑی ہوئی ہیں اور ہمیں امید ہے کہ پاکستان ٹیم یہ ورلڈ کپ ضرور جیتے گی۔پاکستان ویمنز فٹبال ٹیم کی سابق کپتان ہاجرہ خان نے کہا کہ پوری فٹبال کمیونٹی پاکستان کرکٹ ٹیم کو سپورٹ کررہی ہے،کبھی آپ ہارتے ہیں کبھی جیتتے ہیں لیکن آپ ایک بہترین ٹیم کے ذریعے  کامیابی حاصل کرسکتے ہیں،پاکستان ٹیم نے ماضی میں بہترین پرفارمنس دی ہے امید ہے کہ کھلاڑی خود پر یقین رکھتے ہوئے ایک دوسرے کو سپورٹ کرتے ہوئے ایک بار پھر بہترین کارکردگی دکھائیں گے۔ سیف گیمز ٹیبل ٹینس گولڈ میڈلسٹ عارف خان نے کہا کہ  پاکستان ٹیم انفرادی طور پر غیرمعمولی صلاحیتوں کے حامل کھلاڑیوں پر مشتمل ہے۔ جب یہ اکٹھے ہوتے ہیں تو ایک مضبوط ٹیم سامنے آتی ہے۔