مریدکے: ناکے پر نہ رکنے والے کار سواروں پر پولیس کی فائرنگ، ایک جاں بحق، دوسرا زخمی

فیروز والا+ مریدکے (نامہ نگاران) مریدکے نارووال روڈ پر تھانہ صدر کی چوکی عمر کوٹ پولیس اہلکاروں کی فائرنگ سے دو نوجوان زخمی ہو گئے۔ رکشہ ڈرائیور افضل زخموں کی تاب نہ لاتے ہوئے لاہور میو ہسپتال میں چل بسا۔ زخمی افتخار کی حالت بہتر ہے۔ پولیس نے اہلکاروں کے خلاف والد ارشد کی مدعیت میں مقدمہ درج کر لیا۔ ایک پولیس اہلکار گرفتار کر لیا گیا۔ بتایا جاتا ہے کہ گزشتہ رات داوکے کے رہائشی کار سوار نارووال روڈ پر ماڑی چہلاں کے قریب سے گزر رہے تھے کہ عمر کوٹ چوکی کے اہلکاروں نے ناکہ لگائے انہیں روکا تو کار سواروں نے رُکنے کی بجائے گا ڑی بھگا دی جسے مشکوک سمجھ کر پولیس نے فائرنگ کر دی۔ جس میں افضل اور افتخار عرف ٹونی شدید زخمی ہو گئے۔ جنہیں پولیس نے خود ہی اپنی گاڑیوں میں مریدکے تحصیل ہیڈکوارٹر ہسپتال منتقل کیا۔ ڈی پی او شیخوپورہ بلال ظفر شیخ نے فوری طور پر معاملے کی انکوائری کیلئے ایس پی انویسٹی گیشن رانا غلام عباس کو مریدکے بھیجا جنہوں نے واقعہ کی انکوائری کرتے ہوئے ملوث پولیس اہلکاروں پر مقدمہ درج کر کے ایک کانسٹیبل آغا شاہین کو گرفتار کر پابند سلاسل کر دیا۔