لاہور(سپورٹس رپورٹر) سپین کے مشہور فٹ بال کلب ریال میڈرڈ اور انگلش کلب چیلسی کے سابق فرانسیسی سٹار کھلاڑی نائیکولس انیلکا اسلام آباد پہنچ گئے۔نائیکولس انیلکا کو اسلام آباد ائیرپورٹ پہنچنے پر انہیں پاکستان فٹبال فیڈریشن کی جانب سے خوش آمدید کہا گیا۔ نائیکولس انیلکا کو پی ایف ایف کی جانب سے مدعو کیا گیا ہے تاکہ پاکستان میں فٹبال کو فروغ دیا جا سکے۔ اس دوران نائیکولس انیلکا پاکستان فٹ بال فیڈریشن کے نئے صدر سید اشفاق شاہ سے ملاقات کریں گے اور پاکستان میں فٹ بال کھیل کی بہتری اور ترقی کے لیے 20 نکاتی ایجنڈے پر غور کریں گے۔ نائیکولس انیلکا فٹبال مداحوں سے سینٹورس مال میں ملاقات بھی کریں گے اور فٹ بال کے لیے ان کی حوصلہ افزائی کریں گے۔ نائیکولس انیلکا کا پاکستان کا دورہ ٹچ سکائی گروپ کے تحت ہونے والے ورلڈ سوکر سٹار کا حصہ ہے جس کے تحت لاہور اور کراچی میں نمائشی میچز بھی ہوں گے۔ دورہ پاکستان کے حوالے سے نائیکولس انیلکا کا کہنا ہے کہ جب سے میں نے اسلام قبول کیا ہے تب سے پاکستان سے خاص لگاؤ ہے، میری آمد پاکستان میں فٹبال کو آگے بڑھنے میں مدد دے گی۔