ملکی دولت ڈکارنے پر کسی کو معاف کرنا قوم سے زیادتی ہو گی: فیاض چوہان

لاہور (نیوز رپورٹر) وزیراطلاعات پنجاب فیاض الحسن چوہان نے کہا ہے کہ ن لیگی رہنمائوں کے ذہنوں سے ابھی تک عوام میں مقبول ہونے کی غلط فہمیاں موجود ہیں جبکہ ان کی ساری کرتوتوں کا کچا چٹھہ عوام کے سامنے کھل کر آچکا ہے۔ آل شریف سمیت تمام لیگی رہنمائوں نے اپنے دور حکومت میں کرپشن کی بے تحاشا گاجریں کھائیں۔ اب نیب اور عدالتوں میں پیشیوں پر ان کے پیٹ میں مروڑ اٹھ رہے ہیں۔ ان خیالات کا اظہار صوبائی وزیر اطلاعات نے رانا ثناء اللہ کے بیانات کے ردعمل میں کیا۔ انہوں نے اس موقع پر کہا کہ حکومت پر نواز شریف سے سیاسی انتقام کا الزام سراسر غلط ہے۔ مسلم لیگ (ن) آج تک نواز شریف کی بیماری کے معاملے پر سیاست کر رہی ہے۔ رانا ثناء اللہ عوام کو گمراہ کرنے کا کوئی موقع ہاتھ سے نہیں جانے دیتے۔ ملکی دولت ڈکار نے پر کسی کو معاف کرنا قوم کے ساتھ زیادتی ہو گی۔