حسان خاور کا جیلانی پارک میں جاری جشن بہاراں میلہ کا دورہ

 لا ہو ر ( نوائے وقت رپو رٹ )  معاون خصوصی وزیر اعلی پنجاب حسان خاور نے جیلانی پارک میں جاری جشن بہاراں میلہ کا دورہ کیا اور مختلف سٹالز کے انتظامات کا جائزہ بھی لیا۔ انہوں نے جیلانی پارک میں جشن بہاراں کیلئے لگائے گئے ہاٹ ایئر بیلون کی رائیڈ بھی لی۔ حسان خاور نے انتظامات کو تسلی بخش قرار دیا اور انتظامیہ کی تحسین کرتے ہوئے کہا کہ وزیر اعلی پنجاب کی ہدایات کے مطابق پارکس اینڈ ہارٹیکلچر اتھارٹی بہترین کام کر رہی ہے۔ حسان خاور نے کہا کہ لوگوں کی تفریح کے لیے پی ایچ اے کی انتظامیہ ہر بار کچھ نیا کرنے کی کوشش کرتی ہے۔ ہاٹ ایئر بیلون اس سال جشن بہاراں کے میلے میں ایک بہترین اضافہ ہے۔ انہوں نے مزید کہا کہ ہاٹ ایئر بیلون کی رائیڈ زیادہ سے زیادہ چھ سو فٹ بلندی تک کی جا سکتی ہے۔ اس رائیڈ کے ذریعے بلندی پر جا کر جیلانی پارک اور شہر کا خوبصورت نظارہ کیا جا سکتا ہے۔ حسان خاور نے کہا کہ عوام جشن بہاراں کے میلے کے دوران ہاٹ ایئر بیلون کی سیر سات مارچ تک کر سکیں گے۔ انہوں نے کہا کہ بہار کے اس میلے میں تمام صوبوں کی نمائندگی کے ساتھ سیر و تفریح کے بھرپور مواقع موجود ہیں۔ حسان خاور نے کہا کہ اکتیس مارچ تک جاری رہنے والے اس میلے میں کھانے پینے سے لے کر ہینڈی کرافٹس کی اشیا کے اسٹالز لگائے گئے ہیں۔ جشن بہاراں میلہ کے جائزے کے دوران چیئرمین پی ایچ اے سید یاسر گیلانی بھی حسان خاور کے ہمراہ تھے۔