عوام کی نظریں سپریم کورٹ کے بجائے پارلیمان پر ہونی چاہئیں، چیف جسٹس

اسلام آباد(نوائے وقت رپورٹ) چیف جسٹس قاضی فائز عیسیٰ نے پارلیمنٹ کے بنائے قانون کو پائیدار قرار دیتے ہوئے کہا ہے عوام کی نظریں سپریم کورٹ کے بجائے پارلیمان کی جانب ہونی چاہئیں۔ چیف جسٹس آف پاکستان جسٹس قاضی فائز عیسیٰ نے سپریم کورٹ کے ریٹائر ہونے والے سینئر ترین جج جسٹس سردار طارق مسعود کے اعزاز میں پاکستان بار کونسل کے عشائیے سے خطاب میں کہا میں بہت خوش قسمت ہوں کہ جسٹس سردار جیسا سینئر جج ملا۔ چیف جسٹس قاضی فائز عیسیٰ نے کہا جسٹس سردار طارق مسعود نے ہمیشہ انتظامی اور قانونی درست مشورے دیے ۔ چیف جسٹس نے کہا پارلیمنٹ کے قانون کو ہمیشہ سراہنا چاہیے اگر وہ آئین اور بنیادی حقوق سے متصادم نہ ہو اور عوام کی نظریں سپریم کورٹ کے بجائے پارلیمان کی جانب ہونی چاہئیں۔ چیف جسٹس نے کہا عوام کے نمائندوں کے فیصلے پائیدار ہوتے ہیں، پارلیمان میں بحث سے مشترکہ فیصلوں کی روایت بہترین ہے اور پارلیمان ہی ہے جس نے آئین بنایا تھا۔