میڈرڈ اوپن : ثانیہ مرزا‘مارٹینا ہنگس کی جوڑی سیمی فائنل میں پہنچ گئی

میڈرڈ(سپورٹس ڈیسک) بھارتی ٹینس سٹا ر ثانیہ مرزا اور سوئٹز رلینڈ کی مارٹینا ہنگس کی جوڑی میڈرڈ اوپن کے سیمی فائنل میں پہنچ گئی ۔ٹاپ سیڈ جوڑی نے کوارٹر فائنل میں چیک ریپبلک کی جوڑی اینڈریا ہلچکووا اور لوئسی ہراڈیکا کو چھ تین اور چھ دوشکست دی۔میچ ایک گھنٹہ اور د ومنٹ تک جاری رہا۔ ٹورنامنٹ کے مینز سنگلز مقابلو ں کے تیسرے رائونڈ میں میں ٹومس برڈچ‘کی نشیکوری اور اینڈی مرے کوارٹر فائنل میں پہنچ گئے ۔چیک ریپبلک کے ٹومس برڈچ نے سپین کے ڈیوڈ فیرر کوسات چھ اور سات پانچ سے شکست دی۔جاپان کے کی نشیکوری نے فرانس کے رچرڈ گیسکوئٹ کو چھ چار اور سات پانچ سے شکست دی۔برطانیہ کے اینڈی مرے نے فرانس کے گائلز سائمن کو چھ چار اور چھ دو سے ہراکر کوارٹر فائنل میں جگہ بنالی۔خواتین کے سنگلز کوارٹر فائنل میں رومانیہ کی سیمونہ ہلیپ نے ہم وطن ایرینا بیگو کو چھ تین ‘صفر چھ اور چھ ایک سے شکست دے کر سیمی فائنل میں جگہ بنالی ۔امریکہ کی لوئیساچریکو نے آسٹریلیا کی ڈاریا گیوری لوواکو سات چھ اور چھ ایک سے شکست دے کر سیمی فائنل میں سیٹ پکی کرلی۔