بارش، آندھی، ریلے: حادثات میں بچی سمیت 5جاں بحق، 3طلبا کو بچالیا گیا

اوکاڑہ؍ ہری پور؍ مستونگ (نامہ نگار+ اے پی پی+ نیٹ نیوز) مستونگ کے قریب آسمانی بجلی گرنے سے 2 افراد، اوکاڑہ میں چھت گرنے سے خاتون  جاں بحق  جبکہ 2 زخمی ہو گئے اور ٹرک نے خاتون کو کچل دیا۔ جاں بحق اور زخمی ہونے والے افراد کوئٹہ سے مستونگ جا رہے تھے۔ نعشوں اور زخمیوں کو مستونگ کے غوث بخش ہسپتال منتقل کر دیا گیا۔ ریسکیو 1122 ذرائع کے مطابق گزشتہ شب بارش کے دوران چک نمبر11/1ALکے رہائش پذیر محنت کش طیب کے مکان کی بانسوں سے بنی چھت گر گئی۔ کمرے میں موجود 2 خواتین 55 سالہ حنیفاں بی بی زوجہ نواز اور30سالہ پروین زوجہ طیب چھت کے ملبے تلے دب گئیں۔ واقعہ کی اطلاع ملنے پر ریسکیو 1122کی ٹیمیں جائے وقوعہ پر پہنچ گئی ریسکیو اہلکاروں نے کارروائیاں کرتے ہوئے ملبے تلے دبی خواتین کو باہر نکالا جن میں سے ایک خاتون حنیفاںبی بی جاںبحق ہو چکی تھی۔ بتایا گیا ہے کہ فیصل آباد روڈ اوکاڑہ شوگرملز کے قریب ایک نامعلوم خاتون تیز آندھی اور بارش کے دوران روڈ کراس کرنے لگی تھی کہ ایک تیز رفتار ٹرک نے خاتون کو کچل ڈالا۔ خاتون موقع پر ہی جاں بحق ہوگئی۔ حادثہ کی اطلاع ملتے ہی پولیس موقع پر پہنچ گئی۔ ضروری کارروائی کے بعد خاتون کی نعش کو ہسپتال منتقل کر دیا گیا۔ پولیس نامعلوم ٹرک ڈرائیور کی تلاش کر رہی ہے۔