لاہور(کامرس رپورٹر)پاکستان کے واحد اسنو تھیم ایڈوینچر پارک ونٹر لینڈ نے منفی10ڈگری کے ماحول کے ساتھ ہر ایک کیلئے ایک شاندار تجربے کے ساتھ ناقابل یقین تفریح کا آغاز کردیا ہے ۔لوگوں کیلئے اس شاندار تفریح گاہ کے دروازے کھل گئے ہیںجو ہر ایک عمر کے فرد کیلئے سنسنی ،ٹھنڈک اور ناقابل فراموش یادیں سمیٹنے کا موقع فراہم کررہا ہے۔ اس انتہائی منتظر ایونٹ ونٹر لینڈ نے موسم سرما کا حقیقی تجربہ فراہم کیا جہاں اسنو فلیک آرک ویز،سحر انگیز گذرگاہ اور ایک فروٹ آئس کیوب بار پر مشتمل دلکش تھیم پر مبنی مکمل سجاوٹ کے ساتھ خوشگوار ہٹ موجود تھا۔ اس موقع پر لوگوں نے ٹھنڈی ٹھار رائیڈز کا لطف اٹھایا اور ونٹر لینڈ کے نام سے مشہور اس حیرت انگیز ماحول میںگھل مل گئے۔ ا س تقریب میںشوبز انڈسٹری کے معروف ستاروںنے بھی چار چاند لگائے اور شام کو مزید حسین بنا دیا،جس میں انٹر ٹینمنٹ آئیکون حسن شہریار یاسین(ایچ ایس وائی)،سوشل میڈیا اسٹار دنا نیر،معروف اداکارہ مریم نفیس،ڈیجیٹل کریئٹر رانا حمزہ یوسف اور پاکستان کی سب سے مشہور یوٹیوب شخصیت میں سے ایک ڈکی بھائی(سعد الرحمن)شامل تھے،جبکہ معروف موسیقار شمعون اسماعیل نے اپنی دلکش پرفارمنس سے تقریب کی رونق کو دوبالا کردیا۔