صادق خان نے ہر پاکستانی کا سر فخر سے بلند کر دیا: شہباز شریف

اسلام آباد(خبرنگارخصوصی)وزیراعظم محمد شہبازشریف نے صادق خان کو لندن کا مئیر منتخب ہونے پر اپنے تہینتی پیغام میں لندن کا مئیر بننے کی ہیٹرک مکمل کرنے پر صادق خان کو مبارک باد دی ہے۔ وزیر اعظم آفس میڈیا ونگ کی جانب سے جاری پریس ریلیز کے مطابق وزیر اعظم نے کہا کہ ایک محنتی برطانوی پاکستانی کے قابل فخر فرزند نے اپنے والدین کا ہی نہیں ، ہر پاکستانی کا سر فخر سے بلند کیا ہے۔ وزیراعظم نے کہا کہ تیسری بار لندن کا مئیر منتخب ہونا یقینا صادق خان کی قابلیت اور عوامی خدمت کا منہ بولتا ثبوت ہے۔ وزیر اعظم محمد شہباز شریف نے مستقبل میں صادق خان کی مزید کامیابیوں کے لئے نیک تمنائوں کا بھی اظہار کیا۔ علاوہ ازیں  وزیراعظم محمد شہبازشریف نے سعودی عرب کے معروف شاعر اور ادیب شہزادہ بدر کے انتقال پر رنج وغم اور افسوس کا اظہار کیا ہے ۔وزیر اعظم نے اتوار کو ایکس پر اپنی ایک پوسٹ میں کہا کہ شہزادہ بدربن عبد المحسن کی وفات یقینا سعودی عرب کیلئے ہی نہیں بلکہ پورے جزیرہ عرب میں ان کے مداحوں کے لئے بڑے غم کی خبر ہے۔ شہزادہ بدر کا لکھا سعودی عرب کے قومی دن پر سب سے زیادہ سنا جانے نغمہ ان کی یاد ہمیشہ دلاتا رہے گا۔ وزیراعظم شہبازشریف نے سعودی عرب کی قیادت، عوام اور مرحوم کے اہل خانہ سے تعزیت اور ہمدردی کا اظہار بھی کیا اور شہزادہ بدربن عبد المحسن کی مغفرت اور اہل خانہ کے لئے صبرجمیل کی دعا بھی کی۔