بین الصوبائی بوائز اینڈگرلز ہاکی ٹورنامنٹ پنجاب نے جیت لیا

لاہور ( سپورٹس رپورٹر) سپورٹس بورڈ پنجاب کے زیراہتمام ہونیوالا بین الصوبائی بوائز اینڈگرلز ہاکی ٹورنامنٹ پنجاب نے جیت لیا،سپورٹس بورڈ پنجاب کی جانب سے فاتح ٹیم کو 50ہزار روپے، رنراپ اور تیسری پوزیشن لینے والی ٹیموں کو 30 اور25ہزار روپے دیئے گئے۔ بین الصوبائی بوائز اینڈگرلز ہاکی ٹورنامنٹ کے فائنلز میں پنجاب کی بوائز ہاکی ٹیم نے سندھ کو 4-2 اور پنجاب کی گرلز ہاکی ٹیم نے فائنل میں خیبر پی کے کو 9-0 سے شکست دیدی۔ پنجاب کی بوائز ہاکی ٹیم کی جانب سے محمد عماد نے دو، حمزہ فیاض اوربشارت علی نے ایک، ایک گول کیا،سندھ بوائز ٹیم کی جانب سے سعد ظہیر اور عبدالوہاب نے ایک، ایک گول کیا،خیبر پی کے کی بوائز ہاکی ٹیم نے آزاد کشمیر کی ٹیم کو 5-0سے شکست دیکر تیسری پوزیشن حاصل کرلی،خیبر پی کے کی جانب سے احمد اللہ، عصمت احمد نے دو، دو جبکہ حسن علی نے ایک گول کیا،آزاد کشمیر کی ٹیم چوتھے نمبر پر رہی، پنجاب کی جانب سے مہک رشید نے تین، ساریکا سرور، سائرہ یونس نے دو، دو، ملیحہ یونس اور شارے مراد نے ایک، ایک گول کیا،سندھ کی گرلز ہاکی ٹیم نے بلوچستان کی ٹیم کو 5-0ہرا کر تیسری پوزیشن حاصل کرلی۔