اسرائیلی دہشت گردی ،4 فلسطینی شہید : غزہ ، القسام ، بریگیڈزکے ٹھکانے پر 10 میزائل فائر

غزہ (این این آئی) اسرائیلی فوج نے مغربی کنارے میں فائرنگ کر کے 4 فلسطینی شہید‘ متعدد زخمی کر دیئے۔ جنگی طیاروں نے صبح غزہ کی پٹی کو متعدد میزائلوں سے نشانہ بنایا ہے۔ مقامی ذرائع نے بتایا کہ وسطی غزہ کی پٹی میں المغازی مہاجر کیمپ کے داخلی راستے پر القسام بریگیڈز کے ٹھکانے پر کم از کم 10 میزائل داغے گئے۔ اس حملے میں کوئی جانی نقصان نہیں ہوا تاہم قرب و جوار کے کئی مکانات کو نقصان پہنچا۔ دھماکوں کے بعد مہاجر کیمپ کی بجلی منقطع کر دی گئی۔ سوشل میڈیا پر شیئر کی گئی تصاویر میں فضائی حملوں کے بعد غزہ میں آگ کے گولے اور دھواں دیکھا گیا ہے۔ اسرائیلی فوج کے ایک بیان میں بہانہ بنایا گیا اسرائیل کی طرف داغے گئے چار راکٹوں کے جواب میں وسطی غزہ کی پٹی میں حماس کی زیر زمین تنصیب کو فضائی حملوں سے نشانہ بنایا ہے۔ اسرائیلی فوجیوں نے جنین اور دیگر علاقوں کا محاصرہ کر رکھا ہے اور لوگوں کو گھروں میں محصور کر کے تلاشی کا عمل جاری ہے۔ متعدد فلسطینی نوجوانوں کو گرفتار بھی کرلیا گیا، مختلف علاقوں میں فلسطینیوں نے  اسرائیلی فورسز کی پابندیوں کو توڑتے ہوئے اور جان کی پرواہ نہ کرتے ہوئے سڑکوں پر نکل کر اسرائیلی مظالم کے خلاف احتجاج کیا۔