لاہور (نیوز رپورٹر)رائل کالج آف فزیشنز ایڈنبرا یو کے نے صدر پروفیسر اینڈریو ایلڈر کی قیادت میں کنگ ایڈورڈ میڈیکل یونیورسٹی لاہورکے تاریخی لائبریری ہال میں رول سائننگ کی تقریب کا اہتمام کیا۔  تقریب میں پروفیسر خالد مسعود گوندل کو طبی تعلیم و تحقیق میں بے مثال خدمات کے اعتراف میں رائل کالج آف فزیشنز ایڈنبرا کی جانب سے اعزازی فیلوشپ سے نوازا گیا۔کالج آف فزیشنز اینڈ سرجنز پاکستان کے سینئر نائب صدر اور فاطمہ جناح میڈیکل یونیورسٹی کے وائس چانسلر پروفیسر خالد مسعود گوندل نے بطور مہمان خصوصی شرکت کی۔ نیشنل ریزیڈنسی پروگرام سی پی ایس پی کے ڈائریکٹر جنرل اور کنگ ایڈورڈ میڈیکل یونیورسٹی کے وائس چانسلر پروفیسر  محمود ایاز نے بطور گیسٹ آف آنر شرکت کی۔  رائل کالج آف فزیشنز سکاٹ لینڈ  کی نائب صدر ڈاکٹر سوسن پاؤنڈ نے پروفیسر خالد مسعود گوندل کی طبی خدمات پر روشنی ڈالی  جبکہ پروفیسر اینڈریو ایلڈر نے پروفیسر خالد مسعود گوندل کو رائل کالج آف فزیشنز ایڈنبرا کی اعزازی فیلوشپ سے نوازا۔پروفیسر گوندل نے کامیابی کووالدین ، اساتذہ کی دعاؤں کے نام کیا ہے۔