لاہور (سپورٹس رپورٹر) محمد ہریرہ کو سری لنکا اے کیخلاف 11 سے 29 نومبر تک کھیلی جانے والی ہوم ریڈ اینڈ وائٹ بال سیریز کیلئے پاکستان شاہینز کا کپتان مقرر کیا گیا ہے۔ سیریز میں دو چار روزہ اور پچاس اوورزکے تین میچ شامل ہیں۔سری لنکن ٹیم کل اسلام آباد پہنچے گی ‘کھلاڑی 9نومبر سے ٹریننگ کاآغازکریں گے۔مینز نیشنل سلیکشن کمیٹی نے دو چار روزہ میچوں کیلئے 14 رکنی سکواڈ کا اعلان کیا ہے جبکہ پچاس اوورز کے میچوں کیلئے 15 رکنی سکواڈ کا انتخاب کیا گیا ہے۔ ٹیسٹ فاسٹ بائولرز محمد وسیم جونیئر اور خرم شہزاد اپنا ری ہیب مکمل کرنے بعداور قائد اعظم ٹرافی کے میچز کھیلنے کے بعد سکواڈ میں شامل ہوے ہیں۔ سکواڈ میں شامل دوسرے ٹیسٹ کرکٹر حسین طلعت ہیں جو پچاس اوورز کی سیریزمیں شامل ہیں۔محمد غازی غوری اور احمد صفی عبداللہ پہلی مرتبہ شاہینز کی نمائندگی کریں گے۔وائٹ بال سکواڈ میں عبدالصمد، حیدر علی، معاذ صداقت، محمد حارث، محمد عمران جونیئر اور روحیل نذیر نے اے سی سی مینز ایمرجنگ ایشیا کپ سکواڈ سے اپنی جگہ برقرار رکھی ہے جبکہ محمد عمران، سراج الدین اور عبید شاہ پہلی بار شاہینز کی ٹیم میں شامل ہونگے۔پاکستان شاہینز کا ریڈ بال سکواڈآج سے ٹریننگ کا آغاز کریگا۔ سری لنکا اے9نومبر کو ٹریننگ کا آغاز کریگی۔ وائٹ بال سیریز کے کھلاڑی 22 نومبر کو اسلام آباد میں جمع ہوں گے۔ تین ایک روزہ میچوں کی سیریز 25، 27 اور 29 نومبر کو کھیلی جائیگی۔ پی سی بی نے سیریز کیلئے میچ آفیشلز کا بھی اعلان کردیا ہے۔ اقبال شیخ 11-14 نومبر اور 18-21 نومبر کے میچز کیلئے پلیئنگ کنٹرول ٹیم کی قیادت کریں گے جبکہ بلال خلجی 50 اوورز کے تین میچوں کے میچ ریفری ہوں گے۔ دونوں میچ ریفریز پی سی بی ایلیٹ پینل آف میچ ریفریز کا حصہ ہیں۔پانچ میچوں میں امپائرنگ کی ذمہ داریاں آئی سی سی/ پی سی بی انٹرنیشنل پینل امپائرز آصف یعقوب اور راشد ریاض اور پی سی بی ایلیٹ پینل آف امپائرز عمران جاوید اور ذوالفقار جان سنبھالیں گے۔دونوں چار روزہ میچز صبح ساڑھے نو بجے شروع ہونگے جبکہ ون ڈے میچز صبح نو بجے شروع ہونگے۔چار روزہ میچوں کیلئے سکواڈ۔محمد ہریرہ (کپتان)‘عبدالفصیح‘احمد صفی عبداللہ‘علی زریاب‘حیدر علی ‘ حسین طلعت ‘ کاشف علی‘خرم شہزاد‘ محمد غازی غوری ‘محمد رمیز جونیئر ‘محمد وسیم جونیئر ‘روحیل نذیر‘ سعد خان اور ثمین گل شامل ہیں۔50 اوورز کے میچوں کیلئے سکواڈمیں محمد ہریرہ کپتان‘ عبدالفصیح ‘عبدالصمد ‘ حیدر علی ‘ حسین طلعت ‘معاذ صداقت‘ مہران ممتاز‘ محمد حارث ‘محمد عمران جونیئر ‘محمد عمران ‘ محمد وسیم جونیئر‘ روحیل نذیر‘ شرون سراج‘ سراج الدین اور عبید شاہ شامل ہیں۔