کراچی: پاکستان کے مزاحیہ اداکار عمر شریف کی میت کراچی پہنچا دی گئی ہے۔
ائیرپورٹ پر عمر شریف کے بیٹوں اور عزیز و اقارب نے میت وصول کی۔ میت ترک ائیر لائن کی پرواز سے کراچی پہنچائی گئی۔ عمر شریف کی اہلیہ زرین غزل بھی اسی جہاز میں پاکستان پہنچیں۔میت کو کراچی ائیرپورٹ سے ایدھی سرد خانہ سہراب گوٹھ منتقل کردیا گیا۔ اس دوران میت کو قافلے کی صورت میں ایئرپورٹ سے ایدھی سرد خانے لایا گیا۔اس موقع پر مداحوں کی بڑی تعداد سبز ہلالی پرچم میں لپٹے عمر شریف کی میت پر پھولوں کی پتیاں نچھاور کرتی رہی۔
عمر شریف کی نماز جنازہ سہ پہر 3 بجے کلفٹن میں ادا کی جائے گی۔ ان کو عبداللہ شاہ غازی کے مزار کے احاطے میں سپرد خاک کیا جائے گا۔
ڈمنسٹریٹر کراچی مرتضیٰ وہاب کا کہنا ہے کہ دنیا میں پاکستان کا نام روشن کرنے والوں میں عمر شریف کا نام نمایاں ہے۔ عمر شریف ہم میں نہیں رہے.مگر ان کی باتیں ہمیشہ ہمارے درمیان رہیں گیانہوں نے کہا ہے کہ عمر شریف کے بیٹے سے مسلسل رابطے میں ہوں۔پوری کوشش ہے کہ عمر شریف کے اہل خانہ کو سہولت دیں۔ اہلخانہ سے کہا ہے کوئی ادارہ عمر شریف کے نام سے منسوب کریں گے.
واضح رہے کہ عمر شریف کا 2 اکتوبر کو جرمنی کے شہر نیورمبرگ کے اسپتال میں انتقال ہوگیا تھا۔ اداکارعمر شریف کی میت کو نیورمبرگ سے پہلے میونخ منتقل کیا گیا تھا جہاں سے ترکش ایئر لائن کی پرواز نمبر TK-1634 کے ذریعے استنبول پہنچایا گیا تھا۔ استنبول انٹرنیشنل ایئرپورٹ سے ترکش ایئر لائن کے طیارے نے پاکستان کے لیے اڑان بھری تھی۔
