لاہور‘ فیصل آباد، شیخوپورہ‘ فیروزوالا (نامہ نگار+ نمائندہ خصوصی+ نمائندہ نوائے وقت + نامہ نگار) ڈیفنس بی لاہور میں 32 سالہ نوجوان حاشر نے نامعلوم  وجوہات پر کنپٹی پر گولی مار کر خودکشی کر لی ہے۔ اطلاع ملنے پر پولیس نے موقع پر پہنچ کر جائے وقوعہ سے شواہد اکٹھے کئے اور نعش پوسٹ مارٹم کیلئے مردہ خانے منتقل کر دی۔ فیصل آباد میں ٹاٹا بازار کا رہائشی پینتیس سالہ تاجر انوارالحق کاروبار بند ہونے کے باعث پریشانی میں مبتلا تھا جس پر دلبرداشتہ ہوکر انوارالحق نے گلے میں پھندا ڈال کر پنکھے سے لٹک کر خودکشی کر لی۔ متوفی تین بچوں کا باپ تھا۔ تھانہ صدر شیخوپورہ کے علاقہ شیش محل میں جواں سالہ لڑکی نے خود کشی کر لی بتایا گیا ہے کہ پمپ والی گلی کی رہائشی جواں سالہ (م) کا گھر میں کسی بات پر جھگڑا ہوا جس پر مشتعل ہوکر اس نے خود کشی کر لی۔ جی ٹی روڈ کی آبادی ننگل ساہداں میں گھریلو پریشانی سے دلبرداشتہ ہو کر دوشیزہ بشریٰ بی بی‘ لاہور روڈ کی آبادی شبلی پارک میں جوان سالہ شادی شدہ خاتون  امرین نے گلے میں کپڑا ڈال کر پنکھے سے جھول کر خود کشی کر لی۔ پولیس نے واقعہ کی رپورٹ درج کر لی۔