لاہور (سپورٹس رپورٹر) پریذیڈنٹ ون ڈے کپ کے دوسرے راؤنڈ میں کھیلے گئے میچوں میں او جی ڈی سی ایل اور واپڈا نے کامیابی حاصل کرلی۔ دفاعی چیمپئن ایس این جی پی ایل اور ایشال ایسوسی ایٹس کا میچ ٹائی ہوگیا۔سٹیٹ بینک اور کے آر ایل کے درمیان راولپنڈی  میں میچ منسوخ کردیا گیا۔یہ میچ دوبارہ کھیلا جائیگا تاریخ کا اعلان بعد میں کیا جائیگا۔ ان میچوں کی خاص بات ایشال ایسوسی ایٹ کے عثمان خان کی دفاعی چیمپئن ایس این جی پی ایل کیخلاف شاندار ڈبل سنچری تھی۔ فیصل آباد میں دفاعی چیمپئن ایس این جی پی ایل اور ایشال ایسوسی ایٹس کا میچ سنسنی خیز مقابلے کے بعد ٹائی ہوگیا۔ایشال ایسوسی ایٹ کی ٹیم پہلے بیٹنگ کرتے ہوئے 351 رنز بناکر آؤٹ ہوگئی۔ عثمان خان نے محمد علی‘ شاہنواز دھانی‘ عباس آفریدی‘ قاسم اکرم اور یاسر شاہ پر مشتمل تجربہ کار بائولنگ اٹیک کے سامنے 132 گیندوں پر 13چھکوں اور 16چوکوں کی مدد سے 201 رنز بنائے۔ آفاق احمد نے68 رنز بنائے۔ محمد علی نے5 وکٹیں حاصل کیں۔ایس این جی پی ایل کی ٹیم   47.5 اوورز میں 351 رنز بناکر آؤٹ ہوگئی۔ عباس آفریدی نے 67 گیندوں پر112 رنز بنائے جس میں 7 چھکے اور 11 چوکے شامل تھے۔عرفات منہاس نے59  رنز بنائے۔ اسد رضا نے تین وکٹیں حاصل کیں۔ایبٹ آباد میں واپڈا نے ڈک ورتھ لوئس قانون کے تحت ہائر ایجوکیشن کو 30 رنز سے ہرادیا۔ہائرایجوکیشن نے 4 وکٹوں پر312 رنز بنائے۔عبید شاہد نے 126 رنز بنائے اور آؤٹ نہیں ہوئے۔علی تاج نے 74 اور محمد جنید نے56 رنز ناٹ آؤٹ بنائے۔واپڈا نے جواب میں38 اوورز میں4 وکٹوں پر246 رنز بنائے تھے۔ محمد اخلاق نے چار چھکوں اور گیارہ چوکوں کی مدد سے 116 رنز بنائے۔ لاہور میں او جی ڈی سی ایل نے غنی گلاس کو 2  وکٹوں سے شکست دیدی۔غنی گلاس نے 9  وکٹوں پر 252 رنز بنائے۔شاداب خان نے چار چھکوں اور پانچ چوکوں کی مدد سے 81 رنز بنائے۔ او جی ڈی سی نے ہدف  49.2 اوورز میں 8 وکٹوں پر پورا کرلیا۔راجہ حمزہ وحید نے 73 رنز بنائے۔عادل امین نے 57 رنز کی اننگز کھیلی۔ثمین گل نے تین وکٹیں حاصل کیں۔