نبی اکرمؐ کی حیات طیبہ انسانیت کیلئے تاقیامت رول ماڈل ہے:حسن محی الدین قادری  

لاہور(خصوصی نامہ نگار ) چیئرمین سپریم کونسل تحریک منہاج القرآن ڈاکٹر حسن محی الدین قادری نے منہاج القرآن کے سکالرز اور لاہور تنظیم کے ذمہ داران کے ایک اجلاس سے خطاب کرتے ہوئے کہا حضور نبی اکرمؐ کی حیات طیبہ ساری انسانیت کیلئے تاقیامت رول ماڈل ہے۔ حضور نبی اکرمؐ کی حیات مبارکہ پوری انسانی تہذیب و تمدن کی اصلاح و تعمیر کا جامع عنوان ہے جو قرآن حکیم کے ابدی اصولوں کی تفسیر ہے جسے نبی کریم ؐ نے عمل کی زبان میں پیش کیا ہے۔ حضور ؐ نے زندگی کے ہر شعبے،ہر گوشے اور ہر پہلو کے بارے میں مکمل رہنمائی عطا فرمائی ہے۔ہر انسان کو ہدایت و رہنمائی حضور نبی اکرم کی حیات کامل اور سیرت پاک میں ملتی ہے۔ تحریک منہاج القرآن لاہور نے اس سال 41ویں عالمی میلاد کانفرنس کو تاریخ ساز بنانے کیلئے جو خدمات انجام دیں۔ وہ ہر اعتبار سے قابل ستائش و قابل تعریف ہیں۔ اس پر میں صدر پروفیسر ذوالفقار علی،ناظم لاہور امجد حسین چودھری، سینئر نائب صدر ڈاکٹر سلطان محمود چودھری، کیپٹن(ر) عبدالمجید، حاجی امجد علی قادری، محمد افضل بھٹی، میاں ممتاز حسین، ریحان چودھری سمیت لاہور کی جملہ تنظیم کو مبارکباد دیتا ہوں۔ اس کے علاوہ نائب ناظم اعلیٰ علامہ رانا محمد ادریس بھی مبارکباد کے مستحق ہیں۔