اسرائیل کی جگہ ہوتا تو ایرانی تیل تنصیبات پرحملے کی بجائے  متبادل پر غور کرتا، جوبائیڈن

واشنگٹن(این این آئی)امریکی صدر جوبائیڈن نے کہا ہے کہ اگر وہ اسرائیل کی جگہ ہوتے تو ایرانی تیل کی تنصیبات پر حملے کے بجائے کسی متبادل پر غور کرتے۔غیرملکی خبررساں ادارے کے مطابق صدر جوبائیڈن نے کہا بعض ڈیموکریٹس کا خیال ہے کہ اسرائیلی وزیراعظم کملا ہیرس کے مقابلے میں ڈونلڈ ٹرمپ کو امریکا کا صدر دیکھنا چاہتے ہیں۔امریکی صدر کا کہنا تھا کہ اسرائیل نے ابھی تک یہ نتیجہ اخذ نہیں کیا کہ ایران کو کیسے جواب دیا جائے، اگر وہ اسرائیل کی جگہ ہوتے تو ایرانی تیل کی تنصیبات پر حملے کے بجائے کسی متبادل پر غور کرتے۔ جوبائیڈن نے مزید کہا انہیں علم نہیں کہ اسرائیلی وزیراعظم نیتن یاہو امریکا کے صدارتی الیکشن پر اثرانداز ہونے کی وجہ سے التوا کا شکار کیے ہوئے ہیں۔ان کا کہنا تھا کہ ان کی انتظامیہ سے زیادہ کسی نے اسرائیل کی مدد نہیں کی، یہ بات اسرائیلی وزیراعظم کو جاننی چاہیے، اگر وہ الیکشن پر اثرانداز ہونے کی کوشش کر رہے ہیں تو وہ اس بات سے واقف نہیں مگر وہ اس پر انحصار بھی نہیں کررہے۔