ٹنڈوالہ یار رکشہ کنویں میں گرنے‘ ٹوبہ بس حادثہ  ‘  6    افراد جاں بحق‘ دو زخمی 

ٹوبہ ٹیک سنگھ‘ ٹنڈوالہ یار (نامہ نگار‘ نیٹ نیوز) مختلف حادثات میں 6 افراد جاں بحق اور دوزخمی ہو گئے۔ تیز رفتار مسافر بس کی موٹر سائیکل رکشہ کو ٹکر سے 2 کمسن بچیاں جاں بحق اور تین افراد زخمی ہو گئے۔ ذیشان‘ علیمہ بی بی‘ حبیب‘ زاہرہ فاطمہ اور میراب ایک رکشہ میں سوار ہوکر جھنگ سے ٹوبہ ٹیک سنگھ شہر کی طرف آ رہے تھے کہ راستہ میں چک نمبر 325 ج ب دلم کے قریب پیچھے سے آنے والی تیز رفتار مسافر بس نے رکشہ کو ٹکر مار دی‘ جس کے نتیجہ میں رکشہ میں سوار 2 کمسن بچیاں 6 سالہ زاہرہ فاطمہ اور 2 سالہ میراب بس تلے بری طرح کچلی گئیں اور موقع پر ہی جاں بحق ہو گئیں۔ بلوچستان کے علاقے ٹنڈوالہ یار میں رکشہ کنویں میں الٹنے سے ایک ہی گھر کے 4 افراد جاں بحق ہو گئے۔ حادثہ بلوچستان کے ضلع  قلات کے نواحی علاقے میں چنگچی رکشہ کنویں میں گرنے کے باعث پیش آیا، مرنے والوں میں باپ، دو بیٹیاں اور ایک بیٹا شامل ہیں۔ جاں بحق ہونے والوں کی شناخت 44 سالہ منچی جوگی، 12 سالہ تگو، 7 سالہ پدما جوگی اور 5 سالہ تیجو جوگی کے ناموں سے ہوئی، جاں بحق ہونے والے خاندان کا تعلق میرپورخاص روڈ پر واقع گاؤں ڈتو کالرو کے خانہ بدوش گھرانے سے ہے۔ جاں بحق افراد کی نماز جنازہ ادا کر کے آبائی قبرستان میں سپرد خاک کر دیا گیا۔