لیاری کےعلاقوں سنگولین، چاکیواڑہ، آٹھ چوک اور دیگرعلاقوں میں ایف سی اورپولیس نے سرچ آپریشن کیا جس میں پولیس کمانڈوزسمیت بھاری نفری نے حصہ لیا۔ سرچ آپریشن کے دوران سنگولین میں ایک مقام پرچھاپہ مار کر تین ملزمان کو گرفتار کر کے دو کلاشنکوف، تین پستول،ایک سیون ایم ایم،موٹرسائیکل اور گولیاں برآمد کرلی گئیں۔ آصف کالونی میں علاقے کا محاصرہ کر کے سرچ آپریشن کیا گیا جس میں دو افراد کو گرفتار کر کے ان کے قبضے سے ایک کلاشنکوف، ایک ٹی ٹی پستول اور گولیاں برآمد کر لی گئی ہیں۔ افشانی گلی، میراں ناکہ اور کلری میں بھی متعدد افراد کو حراست میں لیا گیا۔ لیاری کے علاقے سنگولین میں مکینوں نے آپریشن کے خلاف احتجاج بھی کیا۔جبکہ علی الصبح رینجرز نے سپر ہائی وے پر قائم افغان خیمہ بستی میں بھی آپریشن کرتے ہوئے مشتبہ افراد کو حراست میں لے کر تفتیش کے لیے اُنہیں نامعلوم مقام پر منتقل کردیا ہے۔