عاصمہ ر انی قتل کیس پر جرگہ، اللہ کی رضا کیلئے خون معاف کیا: والد

لکی مروت (نیٹ نیوز) میڈیکل کی طالبہ عاصمہ رانی کے والد نے بیٹی کے قاتل مجاہد آفریدی کو معاف کر دیا۔ عاصمہ رانی کے آبائی شہر سرائے نورنگ میں فریقین کے درمیان صلح کے لیے جرگہ ہوا جس میں دونوں قبیلوں کے مشران نے شرکت کی۔ قتل ہونے والی لڑکی عاصمہ کے والد کا کہنا تھا کہ مجاہد آفریدی خاندان کی معافی قبول ہے۔ ہمارا مقصد ملزم کو مجرم ثابت کرنا تھا جو پورا ہوا۔ عاصمہ رانی کے والد کا کہنا تھا کہ اللہ کی رضا کی خاطر مجاہد آفریدی کو معاف کیا۔ یاد رہے کہ مجاہد آفریدی پر 2018 میں رشتے سے انکار پر عاصمہ رانی کو قتل کرنے کا الزام تھا۔ مجاہد آفریدی واقعہ کے فوری بعد دبئی فرار ہو گیا تھا۔ اسے انٹرپول کے ذریعے گرفتار کیا گیا۔ ایک ماہ قبل عدالت نے جرم ثابت ہونے پر عاصمہ رانی کے قاتل مجاہد آفریدی کو موت کی سزا سنائی تھی۔