عمران خان کی گرفتاری پر شیخ رشید نےحکومت کو خبردار کردیا

راولپنڈی: سابق وزیر داخلہ شیخ رشید کا کہنا ہے کہ پی ڈی ایم نے جو گڑھا عمران خان کے لئے کھودا تھا، اس میں خود گرچکی ہے۔ ٹوئٹر پرجاری بیان میں شیخ رشید نے کہا کہ ملک شدید سیاسی اور اعصابی تناؤ کا شکار اور بند گلی میں داخل ہو گیا ہے۔سابق وزیر داخلہ کا کہنا تھا کہ پندرہ کروڑ نوجوانوں کی جیب میں موبائل فون ہے، حکمرانوں کاغلط فیصلہ عوام کےغیض وغضب میں بدل سکتا ہے، لوگ زمینی حقائق سے واقف نہیں کیونکہ وہ عوام میں نہیں۔انہوں نے کہا عمران خان کی مقبولیت کے طوفان کو قید کرنا یا نااہل کرنا مہنگا پڑسکتا ہے، اقتدار کے بھوکوں کے جمعہ بازار کی الیکشن میں تاخیرانکو لےڈوبے گی۔حکمران اتحاد کو کڑی تنقید کا نشانہ بناتے ہوئے کہا کہ پی ڈی ایم نے جو گڑھا عمران خان کے لیے کھودا تھا اس میں خود گر گئی ہے، ڈالر232 روپے کا سیلاب، غذائی قحط اور وبائی امراض سر پر ہیں۔مزید کہا چوروں نے صرف اپنے کیس ختم کرانے تھے، یہ سیکیورٹی میں فوٹو کھنچا سکتے ہیں،عوام میں نہیں جا سکتے۔