پاکستان، چائنہ شاہین 10فضائی مشقیں شروع، 10Jسی، جے ایف 17تھنڈر طیاروں کی شرکت

اسلام آباد (خبرنگار خصوصی) پاکستان چین  شاہین-10 مشترکہ فضائی مشقوں کا چین کے شمال مغربی شہروں جیوکوان اور ینچوان میں آغاز ہوا۔ پاک فضائیہ کے مایہ ناز لڑاکا طیارے جے-10سی اور جے ایف-17 تھنڈر سمیت معاون ایئر اینڈ گراؤنڈ عملہ مشقوں میں حصہ لے رہا ہے۔ پیپلز لبریشن آرمی ایئر فورس اور پاک فضائیہ 2011 سے شاہین فضائی مشقوں کا انعقاد کر رہے ہیں جس کی میزبانی دونوں ممالک سالانہ متبادل بنیادوں پر کرتے ہیں۔ مشقیں فضائی عسکری طریقہ کار، آپریشنل تیاریوں اور مشترکہ کارروائیوں کو فروغ دینے کے ساتھ اس میں حصہ لینے والے تزویراتی شراکت داروں اور مشکل کی ہر گھڑی میں ایک دوسرے کے شانا بشانہ کھڑے ہونے والے اتحادی ممالک کے مابین ہم آہنگی پیدا کرنے میں معاون ثابت ہوں گی۔ مزید برآں اس فضائی مشق میں ہائبرڈ وارفیئر، سائبر سپیس اور کمپیوٹنگ جیسی خصوصیات کی شمولیت سے ہمہ وقت بدلتا جدید عسکری منظر نامہ  پاک فضائیہ کی آپریشنل صلاحیتوں میں اضافے کا باعث ہوگا۔ یہ مشقیں دونوں برادر ممالک کو ایک جامع دفاعی حکمت عملی تیار کرنے میں معاون ثابت ہوں گی جس کی بدولت مشترکہ چیلنجز کا سامنا کرتے ہوئے اپنی فضائی سرحدوں کے تحفظ کی اہلیت کو مزید مستحکم کیا جا سکے گا۔ پیپلز لبریشن آرمی ائیر فورس اور پاک فضائیہ کے مابین دسویں مشترکہ فضائی مشقیں دونوں ممالک کی فضائی افواج کے مابین دوستی اور اتحاد کے رشتوں کو فروغ دینے کی ایک شاندار کاوش ہے۔