اسرائیلی فوجی گاڑی میں دھماکہ خیز مواد پھٹ گیا، 6 فلسطینی زخمی، حماس کے 3 ارکان گرفتار

تل ابیب(این این آئی)مغربی کنارے کے جنین کیمپ سے انخلا کے دوران اسرائیلی فوج کی ایک فوجی گاڑی میں دھماکہ خیز مواد پھٹ گیا جس کے بعد صہیونی فورسز نے الجنین کیمپ پر دھاوا بول دیا۔ اس دوران حماس کے ایک رہنما سمیت تین ارکان کو گرفتار کرلیا گیا۔ فلسطینی خبر رساں ایجنسی کے مطابق اس آپریشن میں 6 فلسطینی زخمی بھی ہوئے ہیں۔میڈیارپورٹس کے مطابق اسرائیلی فوج کے ترجمان ایویچائی ادرائی نے ایکس پر کہا کہ اسرائیلی فورسز نے حماس کے 3 کارکنوں کو گرفتار کیا ۔ یہ عبداللہ حسن محمد صبیح، ورد الشریم اور معتصم جعایص ہیں۔ ان میں سے ایک فلسطینی کے پاس سے ایم سولہ خودکار رائفل بھی ملی ہے۔ فلسطینی خبر ایجنسی کے مطابق گرفتار تین افراد میں سے دو زخمی بھی ہوئے تھے۔عینی شاہدین کے مطابق اسرائیلی فوج لگ بھگ ایک گھنٹے تک جنین میں کارروائی کرتی رہی اور پھر فلسطینیوں کو گرفتار کرکے ہیلی کاپٹر میں لے جاتے دیکھا گیا۔فلسطینی وزارت صحت کے مطابق 4 افراد زخمی حالت میں ہسپتال لائے گئے تھے۔ عینی شاہدین نے بتایا کہ اس سے قبل خصوصی فورس کی آمد پر کیمپ میں سائرن بجنے لگے جس کے بعد کئی فوجی گاڑیوں نے کیمپ پر دھاوا بول دیا۔ ایک سے زیادہ مقامات پر فائرنگ کی آواز سنی گئی۔ اسرائیلی آرمی ریڈیو نے کہا کہ آپریشن کا مقصد مطلوب افراد کو گرفتار کرنا تھا۔اسرائیلی فوج نے جولائی کے اوائل میں جنین شہر اور اس کے کیمپ میں بڑا فوجی آپریشن کیا تھا جس میں 12 فلسطینی شہید اور 200 کے قریب زخمی ہوئے تھے۔