اسلام آباد ( نمائندہ خصوصی) چیئرمین پاکستان پیپلز پارٹی بلاول بھٹو زرداری سے جمعرات کو زرداری ہاوس اسلام آباد میں پاکستان پیپلز پارٹی کے رہنماوں نے ملاقاتیں کیں۔ بلاول بھٹو زرداری سے حکومتِ سندھ پلاننگ اینڈ ڈولپمنٹ اور توانائی کے وزیر سید ناصر حسین شاہ نے ملاقات کی اور سندھ میں شمسی توانائی کے فروغ کے حوالے سے بریفنگ دی۔ رکنِ قومی اسمبلی میر غلام علی تالپور نے ملاقات کرکے بدین میں بارشوں کے بعد پیدا ہونے والی سیلابی صورت حال اور عوام کے مسائل اور ان کے حل کے لئے تبادلہ خیال کیا۔ رکنِ قومی اسمبلی نوید قمر نے ملاقات کے دوران سیاسی سرگرمیوں کے حوالے سے آگاہی دی۔ چیئرمین بلاول بھٹو زرداری سے پی پی پی رہنما ارباب عالمگیر اور رکنِ خیبرپختونخوا اسمبلی ارباب زرک خان خلیل نے ملاقات میں پشاور اور خیبر پختونخواہ کی سیاسی صورت حال پر گفتگو کی۔