دہشتگردی کو جڑ سے اکھاڑنے کیلئے آخری دم تک کوشش جاری رکھیں گے: زرداری

 اسلام آباد(نمائندہ خصوصی) صدرآصف  زرداری  لاہور میں کیپٹن محمد علی قریشی شہید کے گھر گئے اور شہید کیپٹن محمد علی قریشی کے لواحقین کے ساتھ اظہارِ تعزیت کیا۔ کیپٹن محمد علی قریشی گزشتہ دنوں بلوچستان میں شہید ہوئے تھے۔ صدر نے کیپٹن محمد علی قریشی شہید کیلئے فاتحہ خوانی کی اور ان  کی خدمات اور بہادری کو خراجِ عقیدت پیش کرتے ہوئے کہا کہ مشکل کی اس گھڑی میں ہمدردیاں شہید کے اہل خانہ کے ساتھ ہیں، دہشت گردی کے خلاف جنگ میں بہت سے نوجوانوں نے جانوں کا نذرانہ پیش کیا،  بے نظیر بھٹو بھی دہشت گردی کے خلاف جنگ میں شہید ہوئیں، دہشت گردی کے فتنے کو جڑ سے اکھاڑنے کیلئے آخری دم تک کوششیں جاری رکھیں گے۔ صدر  نے شہید کیپٹن کے اہلِ خانہ کے جذبہ حب الوطنی اور ایثار کو سراہتے ہوئے کہا کہ قوم شہداء  اور ان کے خاندانوں کی قربانیوں کو ہمیشہ یاد رکھے گی۔ صدر  نے کیپٹن محمد علی قریشی کیلئے بلندی درجات، ورثاء  کیلئے صبر جمیل کی دعا کی۔ بعد ازاں صدر  لاہور سے کراچی  چلے گئے۔  سپیکر پنجاب اسمبلی ملک محمد احمد خان نے صدر  کو الوداع کیا۔صدر مملکت آصف علی زرداری سندھ کے 10 روزہ دورے پر کراچی پہنچ گئے۔