چارلسٹن+مونٹریری (اے پی پی) سرینا ولیمز، وینس ولیمز، جلینا جانکووچ اور سٹیفنی ووجلے نے فیملی سرکل کپ ٹینس ٹورنامنٹ کے سیمی فائنل میں جگہ بنا لی۔ امریکہ میں جاری ڈبلیو ٹی اے ایونٹ میں کھیلے گئے ویمنز سنگلز کے پہلے کوارٹر فائنل میں عالمی نمبر ایک امریکہ کی سرینا ولیمز نے جمہوریہ چیک کی لوسی سفا روا کو سٹریٹ سیٹس میں شکست دی، وینس ولیمز نے ہم وطن حریف میڈیسن کیز کو ہرا کر فائنل فور میں جگہ بنائی۔ سربیا کی جلینا جانکووچ نے کینیڈا کی ایگنی بوچرڈ کو شکست دی۔ سوئٹزر لینڈ کی سٹیفنی ووجلے نے ڈنمارک کی کیرولین وزنیاکی کو ناقابل توقع شکست دے کر سیمی فائنل کے لئے کوالیفائی کیا۔ میکسیکو میں جاری ویمنز سنگلز ایونٹ کے پہلے کوارٹر فائنل میں جرمنی کی اینجلیق کربر نے جاپان کی ایومی موریتا کو 6-2 اور 6-1 سے ہرا کر سیمی فائنل میں جگہ بنائی۔ دوسرے کوارٹر فائنل میں روس کی ماریہ کریلینکو نے پولینڈ کی یرذولا رانڈونسکا کو سٹریٹ سیٹس میں شکست دی، کریلینکو کی فتح کا سکور 6-1 اور 6-4 رہا۔ تیسرے کوارٹر فائنل میں روس کی ایناستاسیا پلیوچینکووا نے امریکہ کی لارن ڈیوس دلچسپ مقابلے کے بعد 6-2 اور 7-5 سے ہرا کر سیمی فائنل تک رسائی حاصل کی۔ چوتھے اور آخری کوارٹر فائنل میں رومانیہ کی مونیکا نکولیسکو نے ہنگری کی ٹائمی بابوس کو 7-5 اور 6-2 سے شکست دی۔