ملتان (کرائم رپورٹر) کینٹ میں واقع معروف ڈیپارٹمنٹل سٹور میں خوفناک آتشزدگی‘ آگ نے 5 منزلہ پوری عمارت کو اپنی لپیٹ میں لے لیا۔ فائر بریگیڈ‘ کنٹونمنٹ بورڈ و ریسکیو 1122 کی 16 گاڑیوں نے 15 گھنٹے بعد آگ پر قابو پا لیا۔ پاک فوج‘ پولیس‘ کنٹونمنٹ بورڈ کا عملہ موقع پر موجود رہا۔ مالکان کے مطابق کروڑوں روپے کا نقصان ہوا ہے۔ صدر بازار کینٹ میں واقع اشتیاق احمد کے معروف ڈیپارٹمنٹل سٹور میں گزشتہ روز صبح سوا 9 بجے شارٹ سرکٹ کے باعث آگ لگ گئی‘ آگ اتنی شدید تھی کہ اس نے ڈیپارٹمنٹل سٹور کی 5 منزلہ پوری عمارت کو اپنی لپیٹ میں لے لیا۔ ایس پی کینٹ کے مطابق سٹور میں برننگ میٹریل کی موجودگی کی وجہ سے آگ پر قابو مشکل ہوا۔ واضح رہے کہ ڈیپارٹمنٹل سٹور میں کروڑوں روپے کا سامان موجود تھا جو کہ مکمل طور پر جل گیا۔