لاہور(سپورٹس رپورٹر)آئی سی سی نے ون ڈے اور ٹیسٹ کرکٹ کی نئی رینکنگ جاری کر دی جس کے تحت پاکستانی بیٹسمین امام الحق ون ڈے میں تیسری جبکہ فاسٹ بائولر شاہین شاہ آفریدی ساتویں پوزیشن پر آگئے۔ون ڈے رینکنگ میں پاکستان ٹیم کے کپتان بابراعظم بدستور پہلے نمبر پر براجمان ہیں جبکہ امام الحق 7 پوائنٹس کے اضافے کیساتھ تیسرے نمبر پر آگئے۔ بھارتی بیٹرویرات کوہلی دوسرے نمبر پر ہیں۔بائولنگ میں شاہین شاہ آفریدی 8 پوائنٹس کے اضافے کیساتھ ساتویں نمبر پر آگئے۔ نیوزی لینڈ کے ٹرینٹ بولٹ بدستور پہلے نمبر پر موجود ہیں جبکہ انگلینڈ کے کرس ووکس دوسری اور آسٹریلیا کے جوش ہیزلوڈ تیسری پوزیشن پر ہیں۔ٹیسٹ رینکنگ میں شاہین شاہ آفریدی پانچویں سے چوتھی پوزیشن پر آگئے ہیں۔ پہلے نمبر پر آسٹریلوی کپتان پیٹ کمنز، دوسرے نمبر پر بھارت کے روی چندر ایشون اور تیسرے پر بھارت ہی کے جسپریت بھمرا موجود ہیں۔ٹی ٹونٹی رینکنگ میں کوئی تبدیلی نہیں کی گئی۔ پاکستانی کپتان بابراعظم پہلی اور وکٹ کیپر بیٹسمین محمد رضوان دوسری پوزیشن پر بدستور قائم ہیں۔