علی امین گنڈاپور خدمت کی سیاست مریم نواز سے سیکھیں‘عظمیٰ بخاری

لاہور( این این آئی)وزیر اطلاعات پنجاب عظمی بخاری نے کہا ہے کہ علی امین گنڈاپور خدمت کی سیاست مریم نواز سے سیکھیں،پی ٹی آئی کی 10سالہ حکومت میں خیبر پختوانخواہ ایک ہزار ارب سے زائد کا مقروض ہو گیا ہے، خیبر پختونخوا ہ میں ان کے پاس تنخواہیں ادا کرنے کے پیسے نہیں ہیں، یہ ان کی ناکامی کا منہ بولتا ثبوت ہے۔اپنے بیان میں انہوں نے کہا کہ علی امین گنڈاپور نے 10ہزار مستحقین کی مالی امداد کا اعلان کیا، اب معذرت کر لی، انہوں نے اپنے لیڈر کے نقش قدم پر چلتے ہوئے یوٹرن لیا۔انہوںنے کہا کہ بانی پی ٹی آئی نے بھی ایک کروڑ نوکریاں دینے کا دعوی کیا تھا، 50لاکھ گھروں کے نعرے کو سیاسی نعرہ قرار دیا تھا۔یہ صرف مریم نواز سے متعلق تعصب اور بغض کا اظہار کر سکتے ہیں، مریم نواز نے رمضان پیکج کے تحت 64لاکھ خاندانوں میں مفت راشن تقسیم کیا۔انہوں نے کہا کہ مریم نواز نے 10ہزار مسیحی خاندانوں میں مالی امداد تقسیم کی، وزیر اعلی پنجاب نے 700ہندو خاندانوں میں بھی امداد تقسیم کی۔