لاہور(سپورٹس رپورٹر) میدانی علاقوں میں دھند نے ڈیرے ڈالنے شروع کر دئیے ہیں جس کی بنا پر رات کے اوقات میں موٹروے اور جی روڈ پر ٹریفک کے مسائل نے جنم لینا شروع کردیا ہے۔ محکمہ موسمیات کے مطابق 24گھنٹوں کے دوران ملک کے بیشتر علاقوں میں موسم سرد اور خشک رہے گا تاہم مالاکنڈ ڈویژن اور گلگت بلتستان میں بعض مقامات پر ہلکی بارش اور برفباری کا امکان ہے۔ فیصل آباد، سرگودھا، لاہور، گوجرانوالہ، ساہیوال، ملتان، بہاولپور اور سکھر ڈویژن میں دھند چھائے رہنے کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم سرد اور خشک رہا۔ سب سے زیادہ سردی سکردو میں پڑی اور درجہ حرارت منفی 5 ریکارڈ کیا گیا۔ پاراچنار میں منفی3 ،گلگت منفی 2، قلات اور استور میں منفی 1 ڈگری سینٹی گریڈ ریکارڈ کیا گیا۔