لاڑکانہ (این این آئی) پیپلز پارٹی کے چیئرمین بلاول بھٹو زرداری اور ان کی بہنیں بختاور بھٹو زرداری اور آصفہ بھٹو زرداری کراچی سے خصوصی جہاز کے ذریعے علیحدہ موہن جودڑو ایئرپورٹ پہنچیں جہاں روڈ کے ذریعے انہیں نوڈیرو ہاؤس پہنچایا گیا۔ آمد سے قبل نوڈیرو آنے جانے والے راستوں پر سکیورٹی کے انتظامات سخت کیے گئے تھے جبکہ موہن جو دڑو ایئرپورٹ سے نوڈیرو اور گڑھی خدا بخش بھٹو تک بھاری تعداد میں پولیس اہلکاروں کو مقرر کیا گیا تھا۔ پی پی پی چیئرمین اور ان کے دونوں بہنوں کی آمد کے دوران موہن جودڑو سے لے کر نوڈیرو تک کے سارے راستوں کو دو گھنٹے کے لیے ٹریفک کی آمد و رفت کے لیے بند کیا گیا جس کے باعث مسافروں کو شدید پریشانی کا سامنا کرنا پڑا۔ بلاول، انکی بہنوں نے ذوالفقار علی بھٹو، بینظیر بھٹو سمیت دیگر رہنمائوں کے مزارات پر حاضری دے کر فاتحہ خوانی کی۔