سی این ایس انٹرنیشنل اسکواش چیمپئن شپ،افتتاحی میچ پاکستان کے عماد فرید کے نام

کراچی(اسپورٹس رپورٹر)تیرہویں چیف آف دی نیول اسٹاف اسکواش چیمپئن شپ 2018 کی افتتاحی تقریب روشن خان جہانگیر خان اسکواش کمپلیکس میں منعقد کی گئی۔ کے پی ٹی کے جنرل مینیجر انجینئرنگ ، ریئر ایڈمرل ساجد وزیر خان نے بطور مہمان خصوصی اس تقریب میں شرکت کی۔ٹورنامنٹ ڈائریکٹر کموڈور حبیب الرحمن نے تقریب سے خطاب میں تفصیلات سے آگاہ کیا ایونٹ میں حصہ لینے والے بین الاقوامی کھلاڑیوں کا تعلق مصر، ایران، ہانگ کانگ، آئر لینڈ، ملائیشیا، میکسیکو، پرتگال اور قطر سے ہے۔ کموڈور حبیب الرحمن نے اس میگا ایونٹ میں شمولیت اور معاونت پر کھلاڑیوں ، آفیشلز اور اسپانسرزکے جوش و جذبے کی حوصلہ افزائی کی۔چیمپئن شپ کے پہلے روز کل آٹھ میچز کھیلے گئے ،پہلے رائونڈ کا افتتاحی میچ پاکستان کے عماد فرید اور ملائیشیا کے ریان پاسکل کے درمیان کھیلا گیا اور جیت عماد فریدّّکے حصے میں آئی۔پہلی چیف آف دی نیول اسٹاف انٹرنیشنل اسکواش چیمپئن شپ کا انعقاد 2000؁ میں 6,000 امریکی ڈالر انعامی رقم کے ساتھ کیا گیا تھا۔ وقت کے ساتھ ساتھ انعامی رقم بڑھتی گئی اور امسال چیمپئن شپ کی انعامی رقم 18,000امریکی ڈالر رکھی گئی ہے۔افتتاحی تقریب میں سول و ملٹری شخصیات ، اسپانسرز اور اسکواش کے سینیئر کھلاڑیوں کی بڑی تعداد نے شرکت کی۔