بھلوال‘ بھکر (نامہ نگار+ صباح نیوز) بھکر میں تیز رفتار گاڑی اور بھلوال میں ڈمپر نے 2 موٹر سائیکلیں روند دیں‘ دونوں حادثات میں 4 افراد جاں بحق ہو گئے۔ تفصیلات کے مطابق بھکر میں تیز رفتار گاڑی نے موٹر سائیکل سوار کو روند ڈالا جس کے نتیجے میں 2 افراد جاں بحق ہوگئے۔ ریسکیو ذرائع کے مطابق بھکر کے علاقے دریا خان دلے والا میں تیز رفتار گاڑی نے موٹر سائیکل کو روند دیا جس پر سوار دو افراد موقع پر ہی جاں بحق ہوگئے۔ نوجوانوں کی شناخت جبار شاکر (دلے والا) اور احسان اللہ (کلول)کے ناموں سے ہوئی۔ دوسری جانب مبینہ طور پر چک تین شمالی کے رہائشی ممتاز اور تائید شاہ موٹر سائیکل پر بھلوال شہر آرہے تھے جب بھیرہ بھلوال روڈ پر چک گیارہ بلوچاں والے کے قریب پیچھے سے آنے والی گاڑی نے انہیں ٹکر مار دی جس سے وہ گرگئے اور مخالف سمت سے آنے والے ڈمپرکے نیچے آکر جاں بحق ہوگئے۔