کامونکی ( نمائندہ خصوصی) مرکزی جمعیت اہلحدیث ضلع گوجرانوالہ کے امیر قاری محمد حنیف ربانی نے کہا ہے کہ سیالکوٹ کا واقعہ افسوسناک ہی نہیں شرمناک بھی ہے ۔ انہوں نے سری لنکا کے شہری پر تشدد اور پھر آگ لگا کر جان سے مار دینے کے واقعہ کی پرزور الفاظ میں مذمت کرتے ہوئے فیکٹری مالکان ، مزدور اور انتظامیہ کو ذمہ دار قرار دیا ہے ۔ قاری محمد حنیف ربانی نے کہا کہ اسلام قطعاً ہمیں اس بات کی اجازت نہیں دیتا کہ شہری قانون کو اپنے ہاتھ میں لیں اور کوئی خود فیصلہ کریں ۔ انہوں نے کہا اس واقعہ سے پوری دنیا میں پاکستان کی بدنامی ہوئی ہے ۔ انہوں نے کہا اب ضرورت اس بات کی ہے کہ ملزموں کوعبرتناک سزا دی جائے اوردنیا والوں کو بتا دیا جائے کہ پاکستان امن پسند ملک ہے ۔ انہوں نے کہا کہ سری لنکا ہمارا دوست ملک ہے اور ہم اپنے دوست ملک کے سامنے بہت شرمندہ ہیں ۔ انہوں نے اپنے بیان میں کہا کہ نبی کریمؐکی تعلیمات اس واقعہ کے بالکل بر عکس ہیں ۔ ہمیں قرآن و حدیث کی دامن ہاتھ سے نہیں چھوڑنا چاہئے ۔ انہوں نے اپنے بیان میں یہ بھی کہا کہ واقعہ کی سیلفیاں بنانے والوں کو بھی کٹہرے میں لا کر عبرتناک سزا دلوانی چاہئے ۔