فرانسیسی وزیر اعظم جین کاسٹیکس نے کابینہ اجلاس کے بعد اپنے ٹیلی ویژن خطاب میں 4 ہفتوں کےلئے نئی پابندیوں کا اعلان
فرانس میں کورونا وائرس کی نئی قسم اومیکرون نے خطرے کی گھنٹی بجا دی۔ نئے رپورٹ ہوئے اومیکرون وائرس کے کیسز کی تعداد 25 ہوگئی۔فرانسیسی وزیر صحت نے اعلان کیا ہے کہ کلب 4 ہفتے کے لیے بند رہیں گے۔ وزیر صحت نے کل سے پانچ سے گیارہ سال تک کی عمر کے بچوں کو کورونا ویکسین لگانے کا اعلان بھی کیا۔فرانسیسی وزیر صحت نے کام کرنے والے لوگوں کو ہفتے میں تین دن گھروں سے کام کرنے کی اپیل بھی کی۔جبکہ فرانس میں کورونا کی وبا نے ایک مرتبہ پھر سر اٹھا لیا ہے، اسپتالوں میں مریضوں کے لئے جگہ کم پڑنے کے بعد ایمرجنسی نافذ ہے۔ صورت حال کے پیش نظر فرانسیسی وزیر اعظم جین کاسٹیکس نے کابینہ اجلاس کے بعد اپنے ٹیلی ویژن خطاب میں 4 ہفتوں کے لئے نئی پابندیوں کا اعلان کردیا ہے۔نئی پابندیوں کے تحت ملک کے تمام نائٹ کلب 4 ہفتوں کے لیے بند کردیئے گئے ہیں تاہم ریسٹورنٹس پر گنجائش کی کوئی پابندی نہیں ہوگی۔ملک میں کورونا وبا کے پیش نظر لوگوں کے گھروں سے کام کرنے کو سراہا جائے گا مگر انہیں کسی بھی لحاظ سے پابند نہیں کیا جائے گا۔ باہر نکلتے وقت شہری ماسک پہننے اور سماجی فاصلے کی پابندی کو یقینی بنائیں گے۔فرانسیسی وزیر اعظم نے کہا کہ ملک کی موجودہ صورت حال ہماری انفرادی اور اجتماعی کوششوں کا متقاضی ہے، اب لاک ڈاو¿ن کا وقت نہیں رہا۔جین کاسٹیکس نے کہا کہ اگر فرانسیسی وزارت صحت نے اجازت دی تو ملک میں 5 سے 12 سال کے بچوں کو بھی کورونا ویکسین لگائی جائے گی تاہم 65 سال سے زیادہ عمر کے افراد بغیر اپوائنٹ منٹ بوسٹر شاٹ لگواسکتے ہیں۔واضح رہے کہ یورپ کے کئی ملک اس وقت کورونا کی لپیٹ میں ہیں، کورونا کی اومی کرون قسم منظر عام پر آنے کے بعد کئی ملکوں نے نئی سفری پابندیاں لگادی ہیں۔
