کراچی ( اسپورٹس رپورٹر)سنڈے لیگ شوٹنگ بال میچ یونائیٹڈ شوٹنگ بال کلب شاہ فیصل کالونی ا ور کراچی اسٹارز کے درمیان کھیلا گیا، میچ کے مہمان خصوصی نامور سماجی رہنما اشرف بلوچ تھے، میچ کے آغاز پر مہمان خصوصی اشرف بلوچ کا دونوں ٹیموں کے کھلاڑیوں سے تعارف کرایا گیااس موقع پر شوٹنگ بال کے قومی سینئر کھلاڑی قمرالسلام پیارے،نصیر الدین،محمد شمیم،اعجاز احمد، ملک آصف، سید علی، سید افتخار زیدی، فیضان احمد اور دیگر بھی موجود تھے، سنڈے لیگ شوٹنگ بال میچ میں دونوں ٹیموں کے کھلاڑیوں نے اپنے شاندار کھیل کا مظاہرہ کیا میچ کا پہلا سیٹ یونائیٹڈ کلب نے 16-14 پوائنٹس سے جیتا میچ کا دوسرا سیٹ کراچی اسٹارز نے 16-11 سے جیت کر مقابلا برابر کر دیا تیسرا اور فیصلہ کن سیٹ جو وقت کی کمی کے باعث دس پوائنٹس پر مشتمل تھا یونائیٹڈ کلب نے 10-08 کے اسکور پر جیت کر میچ اپنے نام کر لیا، فاتح ٹیم کی جانب سے عبداللہ، سید اسرار زیدی، ملک ناصر، کاشف بھٹی، سید محسن علی اور تحسین احمد نے شاندار کھیل پیش کیا۔رنر ٹیم کراچی اسٹارز کی جانب سے رضوان احمد، عمیر خان، نصیر بھٹی، معیز احمد، عبدالرشید اور عبدالخالق نے بھی عمدہ کھیل پیش کیا، میچ کے اختتام پر مہمان خصوصی اشرف بلوچ نے کھلاڑیوں سے خطاب کرتے ہوئے اپنے ہر ممکن تعاون کا یقین دلایا، انھوں نے شوٹنگ بال کھیل کو فروغ دینے میں واحد اسپورٹس شوٹنگ بال کلب کے کردار کو سراہا، اس موقع پر مہمان خصوصی اشرف بلوچ نے میچ میں شاندار کھیل پیش کرنے پر اپنی جانب سے نوجوان کھلاڑیوں میں کیش انعامات تقسیم کئے اس میچ میں ریفری کے فرائض قمرالسلام، جاوید احمد اور محمد جمیل نے انجام دیئے۔