بھارت ایشیا کپ میں نہیں آتا تو نہ آئے ، پروا نہیں : جاوید میانداد 

لاہور( سپورٹس رپورٹر) پاکستان کرکٹ ٹیم کے سابق کپتان اور کوچ جاوید میانداد نے کہا ہے کہ بھارت ایشیا کپ میں نہیں آتا تو بھاڑ میں جائے۔ پاکستان کوکوئی فرق نہیں پڑتا۔ ہمیں کرکٹ مل رہی ہے۔کوئٹہ میں صحافیوں سے گفتگو کرتے ہوئے جاوید میانداد نے کہا کہ آئی سی سی اگربھارت کوکنٹرول نہیں کررہا تو گورننگ باڈی کا اور کیا کام ہے؟۔ آئی سی سی کوچاہیے رولز سب کیلئے یکساں بنائے، انڈیا ہوگا اپنے لئے ہوگا۔جاوید میانداد نے کہا کہ بھارت کو یہاں آکر کھیلنے اور ہارنے سے مصیبت ہوجاتی ہے، ماضی میں بھارت شارجہ سے بھی ڈرکر بھاگا تھا۔ شکست پر بھارت میں وبال آجاتا ہے۔ ماضی میں گواسگر کو بھی ہار پر بھارتی عوام سے مسئلے ہوئے۔ عمران خان کو گڈ لک بولتا ہوں۔ زندگی میں سب چلتا ہے۔ گھبرانا نہیں چاہیے۔ فائٹ کرنی چاہیے اور اپنی غلطیوں کو ٹھیک کرکے چلنا چاہیے، سیاست میں اونچ نیچ ہوتی رہتی ہے، سب ایک دوسرے کی ٹانگیں کھینچنے رہتے ہیں، انتظار کرنا چاہے وقت آنے پر کیا کرتے ہیں۔