لاہور؍ اوکاڑہ؍ منڈا چوک (نمائندہ خصوصی+ نامہ نگار) لاہور، مظفر گڑھ اور اوکاڑہ میں 2 خواتین سمیت 3 افراد  نے خود کشی کر لی۔ اوکاڑہ کے  نواحی گائوں 56/2L کی رہائشی  45سالہ سکینہ  نے مبینہ طورپر گھریلو جھگڑے سے  دلبرداشتہ ہوکر مٹی کا تیل خود پر چھڑک کر آگ لگا لی۔ خاتون کا جسم 90فیصد جل جانے کے باعث اسے تشویشناک حالت میں جناح ہسپتال لاہور منتقل کردیا گیا جہاں وہ زخموں کی تاب نہ لاتے ہوئے جاں بحق ہوگئی۔ لاہور کے علاقے کوٹ لکھپت مدینہ ٹاؤن کی رہائشی صفیہ  نے گھریلو جھگڑے پر دلبرداشتہ ہوکر کالا پتھر پی لیا جس سے اس کی حالت غیر ہو گئی۔ صفیہ بی بی کو تشویشناک حالت میں جنرل ہسپتال منتقل کیا گیا جہاں  وہ دم توڑگئی۔ مظفر گڑھ میں سبزی منڈی روڈ پر ٹبی چوک میں دو بیویوں کے جھگڑوں سے تنگ 30 سالہ خالد نے اپنے بازو کی رگ کاٹ لی اور زیادہ خون بہہ جانے کی وجہ سے اس کی موت ہو گئی۔