لاہور(سپورٹس رپورٹر)پریذیڈنٹ ٹرافی کرکٹ ٹورنامنٹ کے چوتھے راؤنڈ  میں غنی گلاس نے ہائر ایجوکیشن کو 161 رنز سے شکست دیدی جبکہ ایس این جی پی ایل نے کے آر ایل کو 8 وکٹوں سے ہرادیا۔ ہائر ایجوکیشن کو غنی گلاس کیخلاف جیتنے کیلئے 479 رنز کا ہدف ملا تھا تاہم  ٹیم317 رنز پر آؤٹ ہوگئی۔ لیگ سپنر محمد رمیز نے5 وکٹیں حاصل کیں۔ پہلی اننگز میں بھی انہوں نے 5 کھلاڑی آؤٹ کیے تھے۔ ایس این جی پی ایل کو کے آر ایل کیخلاف میچ جیتنے کیلئے 232 رنز کا ہدف ملا جو 2 وکٹوں پر حاصل کرلیا۔کامران غلام نے ناقابل شکست101 رنز بنائے۔اظہرعلی نے پہلی اننگز میں 140رنز بنانے کے بعد دوسری اننگز میں بھی ناقابل شکست 93 رنز بنائے۔ کامران غلام اور اظہرعلی نے تیسری وکٹ کی شراکت میں 185 رنز کا اضافہ کیا۔کے آر ایل کی ٹیم دوسری اننگز میں 299 رنز بناکر آؤٹ ہوگئی۔پریذیڈنٹ ٹرافی کا پانچواں راؤنڈ 9 جنوری سے شروع ہوگا۔پی ٹی وی کا مقابلہ ہائر ایجوکیشن کمیشن سے ہوگا۔ایس این جی پی ایل اور واپڈا کی ٹیمیں مدمقابل ہونگی۔کے آر ایل اور سٹیٹ بینک کے درمیان مقابلہ ہو گا۔