خیرپور، کچلاک میں ٹریفک حادثات ، ایک ہی خاندان کے5 افراد سمیت7 جاں بحق،16 زخمی

خیر پور (صباح نیوز+آئی این پی)خیر پور کار اور ٹرالر کے درمیان تصادم کے نتیجے میں ایک ہی خاندان کے 5 افراد جاں بحق اور2 بچوں سمیت 4افرادشدید زخمی ہو گئے جبکہ کچلاک میں ٹریفک حادثے میں دو افراد جاں بحق 12زخمی ہوگئے ۔تفصیل کے مطابق بلوچستان سے تعلق رکھنے والے ایک خاندان کے 7افرادکار میں کراچی سے جھٹ پٹ بلوچستان جا رہے تھے کہ قومی شاہراہ پرکار کنبھ کے قریب ٹرالر سے ٹکرا گئی۔ جس سے کار سوارخاتون اور بچے سمیت 5افراد جاں بحق جبکہ 2بچے زخمی ہوگئے جبکہ ٹرالر کے ڈرائیور اور اسکا ساتھی حادثے کے باعث زخمی ہو گئے۔ زخمی بچوں کو گمبٹ ہسپتال جبکہ نعشوں کو پوسٹ مارٹم کیلئے کوٹ ڈی جی ہسپتال منتقل کردیا گیا ہے۔ حادثے کے باعث قومی شاہراہ پر دونوں طرف ٹریفک بند ہو گئی اور لمبی لائنیں لگ گئیں۔ جائے حادثہ پر امدادی کارروائیاں جاری ہیں دریں اثناء کچلاک میں مسافر وین اور ٹرک میں تصادم کے نتیجے میں دو افراد جاں بحق جبکہ خواتین سمیت بارہ زخمی ہوگئے۔کچلاک میں تیز رفتار ٹرک نے مسافر وین کو ٹکر مار دی افسوسناک حادثے میں دو افراد جاں بحق جبکہ خواتین سمیت بارہ زخمی ہوگئے۔ زخمیوں کو طبی امداد کے لئے سول ہسپتال منتقل کردیا گیا۔