پاکستان ویمنز ٹیم ‘پاکستان شاہینز کے تربیتی کیمپ شروع 

لاہور(سپورٹس رپورٹر)پاکستان ویمنز کرکٹ ٹیم اور پاکستان شاہینز آئندہ سیریز اور ٹورنامنٹس کی تیاریوں کیلئے تربیتی کیمپس کراچی میں شروع ہوگئے ۔پاکستان شاہینز آسٹریلیا میں بنگلہ دیش اے کے خلاف میچز کھیلیں گے اور پاکستان ویمنز ٹیم سری لنکا میں اے سی سی ویمنز ایشیا کپ میں شرکت کریگی۔ٹریننگ اور پریکٹس سیشنز کے ساتھ ساتھ میڈیا کانفرنسز اور دیگر تفصیلات بھی جاری کی گئی ہیں۔پی سی بی سے جاری تفصیلات کے مطابق پاکستان شاہینز 14 جولائی کو ڈارون آسٹریلیا کیلئے روانہ ہوں گے ۔جہاں وہ بنگلہ دیش اے کیخلاف دو چار روزہ میچز کھیلیں گے۔اس دورے میں شاہینز دو ایک روزہ میچز بھی کھیلیں گے اور 19 جولائی سے 18 اگست تک ہونے والے نو ٹیموں کے ٹی ٹونٹی ٹورنامنٹ میں بھی حصہ لیں گے۔ پاکستان ویمنز ٹیم 16 جولائی کو سری لنکا روانہ ہوگی تاکہ 19 جولائی سے شروع ہونے والے اے سی سی ویمنز ایشیا کپ میں شرکت کر سکے۔ پاکستان ویمنز ٹیم نے حنیف محمد ہائی پرفارمنس سینٹر میں صبح 11 بجے سے دوپہر 1 بجے تک ٹریننگ سیشن کیا۔پاکستان ویمنز کرکٹ ٹیم نے ویمنز ایشیا کپ کیلئے تیاریوں کا آغاز کردیا۔ تمام کھلاڑیوں نے ہیڈ کوچ محمد وسیم کی نگرانی میں حنیف محمد ہائی پرفارمنس سنٹر کے نیٹ ایریا میں ٹریننگ سیشن میں حصہ لیا۔