اسلام آباد(آئی این پی)ہاکی ورلڈ لیگ سے پہلے آئرلینڈ کے ہاتھوں شکست کے بعد سیکریٹری پی ایچ ایف کا کہنا ہے کہ ٹیم میں کوئی تبدیلی نہیں ہوگی نہ ہی سینئرز کو واپس بلایا جائے گا۔انگلینڈ میں ہونے والی ہاکی ورلڈ لیگ کی بھرپور تیاری کےلئے ٹیم پاکستان آئرلینڈ پہنچی جہاں ہوم ٹیم کےخلاف تین ٹیسٹ میچوں کی سیریز کھیلی گئی ، جس میں پاکستان کو سیریز میں دو صفر سے شکست کا سامنا کرنا پڑا۔آئر لینڈ کے ہاتھوں اس شکست کے باوجود بھی فیڈریشن کے اعلی حکام پریشان نہیں ہیں۔سیکریٹری شہباز سینئرکہتے ہیں کہ آئر لینڈ کے ہاتھوں شکست خبردار کرنے کےلئے کافی ہے ، کھلاڑیوں کو غلطیوں سے سیکھنا ہو گا ۔ان کا کہنا تھا کہ اس وقت ٹیم میں کوئی تبدیلی نہیں کی جا رہی اور نہ ہی سینئرز میں کسی کو واپس بلایا جارہا ہے ۔ آئر لینڈ کا دورہ کرنے والی ٹیم ہی ہاکی ورلڈ لیگ میں حصہ لے گی۔